Naalakkersuisoq borgmesterip akiuussutissalersuinermi siulliunneqarneranik uparuaasoq

Borgmesterip Charlotte Ludvigsenip kommunimilu atorfillit Nuummi akiuussutissalersuisoqarmat utaqqisorpassuit qaangiinnarlugit akiuussutissalerneqarsimanerat Peqqissutsimut Naalakkersuisup uparuarpaa.

Akiuussutissalersuinermut ataqatigiissaarisoq Anna Wangenheim naammaginnikkunnaarluni ataqatigiissaarisutut tunuarsimavoq. Tamatuunnga pissutaavoq, Kommuneqarfik Sermersuumi borgmesterimit taassumalu atorfilittaasa ilaannit coronamut akiuussutissalersuinermi sallinngorusuttunit tatineqarsimasutut misigisimanera.

Akiuussutissalersuinermut ataqatigiissaarisup Anna Wangenheimip pisimasoq sulisitsisuminut Peqqissutsimut Naalakkersuisoqarfimmut nalunaarutigisimavaa, Peqqissutsimmullu Naalakkersuisup Kirsten L. Fenckerip (N) Sermitsiaq-AG-mut allakkatigut akissuteqarnermini ilisimatitsissutigaa:

- Pisimasoq ilisimaneqalerniariartoq Naalakkersuisut qisuariarlutik Kommuneqarfik Sermersuumut uparuaateqarsimapput, naalakkersuisoq allappoq.

Anna Wangenheim naapertorlugu, Kommuneqarfik Sermersuumi atorfillip ataatsip sioorasaarutigisimavaa, Ifølge Anna Wangenheim lagde en embedsmand fra Kommuneqarfik Sermersooq pres på hende ved at true med at trække kommunens støtte til vaccinations-arrangementet, som Anna Wangenheim organiserede.

Anna Wangenheim naapertorlugu, Kommuneqarfik Sermersuumi atorfillip ataatsip sioorasaarutigisimavaa, akiuussutissalerneqanngikkunik akiuussutissalersuinermut Anna Wangenheimip aaqqissuussaanut kommunip ikiuunnini tunuartissagaa.

Naalakkersuisoq: Taamatut periuseqarneq akuersaarneqarsinnaanngilaq

Kommunimit oqaatigineqarsimavoq taamatut pisoqarsimanngitsoq, Anna Wangenheimimilli isumaqatigiinngissuteqarnermi, akiuussutissalersuinerup aaqqissuunneqarsimanera pillugu naammaginninnginneq pineqarsimasoq.

Naalakkersuisup oqaatigaa, akiuussutissalersuinermi immikkut sullinneqarnissamik inuit ilaasa iluatsitsimanerat akuersaarneqarsinnaanngitsoq:

- Akiuussutissalersuinermi inuiaqatigiinni sanngiinnerusut salliutinneqartussaapput, taamaammallu erseqqissaassutigineqassaaq, allatut pissusilersorsimaneq akuersaarneqarsinnaanngimmat. Pisimasorli ajuusaarnarpoq, allanngortinneqarsinnaanngilarli, Kirsten L. Fencker allappoq.

Borgmesterip Charlotte Ludvigsenip immikkut pineqarluni tulleriaattunit sallinngortinneqarsimanini pisortatigoortumik utoqqatsissutigereerpaa. Tamanna juulip 22-ani, Nuummi atuarfimmi USK-imi akiuussutissalertinniarlutik tulleriaattorpassuarnut akiuussutissat naammassimannginneranni pivoq.

Powered by Labrador CMS