Skip to main content

Naalakkersuisoq akuersissuteqartarnissaq pillugu inatsimmut ammasoq

Pinngitsaaliisimaneq pillugu akuersissuteqartarnissamut inatsisip atuutsinneqalernissaa Danmarkimi saqummiunneqarmat, IA-p Siumullu Folketingimi ilaasortaatitai inatsisip Kalaallit Nunaanni aamma atuutsinneqalernissaa pillugu oqaaseqarsimapput. Isumaginninnermut Naalakkersuisup Martha Abelsenip neriuutigaa, inatsit pinngitsaaliillutik pinerluuteqarsimasut pineqaatissinneqartarnerannut iluaqutaassasoq.

Peqqissutsimut Naalakkersuisoq Martha Abelsen akuersissuteqartarnissaq pillugu inatsisissatut siunnersuut Folketingimi oqallisigineqarlunilu isumaqatiginninniutigineqalerpat malinnaaniarpoq, tassani tamanna Kalaallit Nunaannit pinerluttulerinermut inatsimmi atorneqarsinnaannersoq nalilerniarlugu, naalakkersuisoq Sermitsiaq.AG-mut oqarpoq.

- Naalakkersuisut kinguaassiuutitigut innarliisarnermut tunngatillugu suliassaqarfik eqqumaffigilluarpaat, qularutigineqassanngilluinnarporlu siunnersuut Kalaallit Nunaanni intasisitigut inissisimanermut pitsanngorsaaqataassappat aamma innarliisimasut amerlanerit pineqaatissinneqartarnissaanut tamanna nassataqassappat, siunnersuut Inatsisartunut saqqummiunneqarumaarpoq, Martha Abelsen oqarpoq.

Ullumikkut pinngitsaaliisarnermut nalilersuutigitinneqartarpoq, pinerluuteqartup persuttaanermik qunusaarinermilluunniit atuisimanera imaluunniit pinerluffigineqartup akiuussinnaasimannginnera. Inatsit nutaaq aqqutigalugu tamanna allanngortinneqassaaq.

Nammineq kajumissuseqarneq qanoq paasisassaava?

Helle Jacobsenip Amnesty Internatiornalimi pilersaarusiornermut aqutsisup ajornartorsiut pillugu dr.dk-mut nassuiaatigisimavaa, arnaq atoqateqarusunnani oqarsimanersoq akiuussimanersorlu pillugit inatsimmi annertuumik ullumikkut qitiutinneqartartoq.

- Akuersissuteqarnissaq pillugu inatsimmi tassunga paarlaallugu misissorneqartassaaq arnap akuersisimanissaa ilimanaateqarnersoq  - assersuutigalugu arnaq qiappat, pilersaarusiornermi aqutsisoq oqarpoq.

Naalakkersuisup Martha Abelsenip oqaatigaa, nammineq kajumissuseqarneq kinguaassiuutitigut iliuuserineqartuni tamani tamatigut tunngaviusartussaasariaqartoq.

- Isumaqarpunga inuit tamarmik namminneq timimimmut tunngatillugu oqartussaasut, aamma kikkut tamarmik atoqatigiinnissamut akuersaarlutillu namminneq kajumissuseqartariaqartut. Inatsisissatut siunnersuut maannamut inatsimmit pitsaanerusumik tamatumannga qulakkeerinnissinnaappat, siunnersuut Inatsisarttunut saqqummiunneqassaaq, taanna erseqqissaavoq.

Pinngitsuutinneqartarneq pisuussuteqarnerup uppernarsineqarnissaata tungaanut

Isumaqatigiissummi Folketingimut saqqummiunneqarsimasumi atuarneqarsinnaavoq, akuersissuteqarneq oqaatsitigut imalluunniit iliuutsitigut, soorlu assersuutigalugu kunissinikkut, attuualaarinninnikkut nipitigulluunniit  takutinneqarsinnaasoq.

Inatsimmit nutaami uppernarsaasarneq allanngorinneqanngilaq. Unnerluussisussaatitaasut suli uppernarsaatinik saqqummiussisartussaapput. Pinngitsuutinneqartarneq pisuussuteqarnerup uppernarsarneqarsinnaata tungaanut atuuttarpoq - soorlu ullumikkut aamma taamaattoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER