aalisarnermut inatsit
Naalakkersuisoq aalisartut isertitaqarnissamut periarfissaannik pitsanngorsaarusuppoq
Karl Kristian Krusep (S) tusagassiortunik katersortitsinermini aalisarnermut inatsissatut siunnersuummi qulequttat pingaarnerit nassuiaateqarfigai
- Aalisarneq pillugu inatsimmit siunertaq pingaarneq tassaavoq aalisarneq pillugu inatsisip paasiuminartuunissaa, ullutsinnut naleqquttuunissaa atuisunillu atoruminartuunissaa.
Aalisarnermut Naalakkersuisoq Karl Kristian Kruse (S) sisamanngornermi tusagassiortunik katersortitsinermini aalisarneq pillugu siunnersuut taama oqaaseqarfigaa.
- Sinneqartoorutinik pisuussutinik inuiaqatigiit pigisaannit pilersinneqartunit aalisartut amerlanerit annertunerusumik pissarsinissaat siunertaralugu aalisakkanik pisuussutinik piginnittuunermut tunngatillugu naleqqussaanernik arlalinnik inatsisissatut siunnersuummi siunnersuuteqartoqarpoq, Karl Kristian Kruse ilaatigut oqarpoq.
Atuaruk: Aalisarnermut inatsissaq taarsiivigititseqqunermik kinguneqartitsisinnaavoq
Taamaammat Naalakkersuisut kissaatigaat aalisartut isertitaqarnissamut periarfissaannik pitsanngorsaasoqassasoq
Naalakkersuisut siunnersuutaasa ilagaat Kalaallit Nunaata Kitaani raajanik pisassiissutit agguarneri 43/57 procentimiit sinerissap qanittuani raajarniarnermut 50 procentinngorlugit aamma avataasiorluni raajarniarnermut 50 procentinngorlugit allanngortinneqassasut.
Atuaruk: Inatsisissap nunatta karsianut millionilikkuutaanik akisunaassavaa
Siunnersuutit ilagaat raajarniarsinnaanermut akuersissutinik piffissamut killiligaanngitsunik atorunnaarsitsinissamik ukiunut tallimanut kalerriisoqartalernissaa.
- Raajarniarsinnaanermut akuersissutint piffissamut killiligaanngitsut utertinneqarnissaat pillugu malittarisassat agguaasseqqinnissarlu Inatsisartut immikkut inatsisaanni kingusinnerusukkut aalajangersarneqassapput. Siunnersuummi uani taamaallaat aalajangersarneqarpoq utertitsineq sivikinnerpaamik ukiunut tallimanut siumut nalunaaruteqarluni Inatsisartut inatsisaatigut pisinnaasoq, Karl Kristian Kruse oqarpoq.