Siumup siulittaasua Erik Jensen assut naammagisimaarinnippoq. Sapaatip akunnerata siuliani taanna erseqqissaanikuuvoq Siumut sunaluunniit akigalugu naalakkersuisooqatigiiniinniarnavianngitsoq, taamaattorli aamma naatsorsuutiginerarnikuuaa IA-p tungaanit aamma ataqqineqassasoq namminnerlu ataatsimeersuarnerminni anguniakkatut siunniussatik tusaaniarneqassasut naalakkersuisooqatigiit siunniussaminnik nutarterinerannut atatillugu.

Tamanna maanna pivoq, taamaalillutillu naalakkersuisooqatigiit nunatta aqunneqarnerani siuttututut ingerlaqqinnissaminnut piareerput, tamatumuunali naalakkersuisoqarfiit qulit partiit marluullutik assigiimmik avissimavaat, tassanilu Siumup aningaasaqarnermut naalakkersuisoqarfik, naalakkersuisut siulittaasoqarfianut tulliulluni pissaaneqaqisoq siuttuuffigisussanngorpaa, naalakkersuisoqarfik taanna Erik Jensen-imit siuttuuffigineqalermat.

- Ataatsimeersuarnitta kingorna politikkikkut anguniakkanik nutarterisimanerput, tapiliukkusutavullu naalakkersuisooqatitsinnit tusaaniarneqarluarmata assut nuannaarutigaara. Maanna Siumumit ilanngutsikkusutatta ilai ilanngutsippagut. Namminiilivikkiartuaarnitsinnut atatillugu naalakkersuisoqarfimmik pilersitsisoqarpoq aammalu aningaasaqarnermut naalakkersuisoqarfik akissaaffigilerparput aammalu naalakkersuisoqarfiit tigummeriikkavut ingerlateqqiinnarsinnaavagut, Erik Jensen Sermitsiaq.AG-mut nassuiaavoq.

Múte: Naalakkersusooqatigiit tunngaviat nutartigaq inuiaqatigiinnut iluaqutissiissaaq

Naalakkersuisut siulittaasuat, Múte Bourup Egede (IA) naammagisimaarinnippoq naalakkersuisooqatigiit isumaqatigiissutaat nutartigaq aammalu naalakkersuisut katitigaanerat pillugu:

- Anguniagarput tassaavoq inuiaqatigiinnut annerpaamik angusaqassussinissaq, pissutsit maanna atuuttut aammalu siunissaq eqqarsaatigalugu iliuusissatut isumaqatigiissutigisagut ataatsimut isigalugit. Tatiginnippunga aamma upperaara qinigaaffiup sinnera politikkikkut suliassavut aallulluarnissaannut tunngavigissaartugut, taakkunanngalu suliassaqarfiit sisamat pingaaruteqarluinnartut nutarterinitsinni immikkut saqqumilaartippagut.

Siumut aamma IA ataasinngornermi saqqummiussipput naalakkersuisooqatigiinnissamut isumaqatigiissutip ilassutissaanik, tassanilu suliassaqarfiit sisamat immikkut saqqumilaartinneqarput. Taakku peqqinnissamut, akileraartarnermut, namminiilivikkiartuaarnermut aammalu aatsitassanut tunngasuupput.

- Nalilersuilluaqqaarpugut partiit suleqatigiittut marluulluta assigiinngissutigisinnaasagut eqqumaffigalugit, suleqatigiinnittalu nanginnissaanut atatillugu isumalluarpunga, aamma isumaqarpunga atasinnaasumik patajaatsumillu ullumikkut tunngaviliilluta, Naalakkersuisut siulittaasuat aamma IA-p siulittaasua, Múte Bourup Egede Sermitsiaq.AG-mut oqarpoq

Kielsen, Fontain aamma Poulsen Naalakkersuisuni nutaartaapput

Naalakkersuinikkut pissutsit pillugit malinnaasunit assut soqutigineqarpoq paasissallugu Siumup aamma Naalakkersuisut siulittaasorisimasaat, Kim Kielsen (S) qanoq pissanersoq, taanna tallimanngornermi Inatsisartut siulittaasuattut tunuarpoq. Maannali tassa paasinarsivoq parteeqatimi Karl Tobiassen-ip nammineerluni Naalakkersuisutut tunuartup oqartussaaffigisimasaanut inissippoq, tassaluy aalisarnermut piniarnermullu naalakkersuisutut inissikkami.

Agathe Fontain (IA) peqqissutsimut naalakkersuisunngorpoq, parteeqatini Mimi Karlsen, Inatsisartut siulittaasunngortoq paarlallugu kiisalu Hans Peter Poulsen-ip Erik Jensen-ip naalakkersuisoqarfigisimasaa, ineqarnermut attaveqaqatigiinnermullu naalakkersuisoqarfik oqartussaaffigilerpaa.