Skip to main content

Naalakkersuisooqatigiit isumaqatigiinngitsut

Pele Brobergip namminersulivinnissaq pillugu taasititsinermut kikkut peqataasinnaanersut pillugu oqaaserisimasai naalakkersuinermi suleqatigiinnut unammillertitsivoq.

Naalakkersuisut siulittaasuata kikkut tamarmik takusinnaasaannik naalakkersuisumut naqqiissuteqarnera qaqutigoorluinnartuuvoq. Sapaatilli akunnerata naanerani tamanna pivoq, tassani Naalakkersuisut IA-llu siulittaasuata Múte B. Egedep tusagassiorfinnut nalunaaruteqarluni erseqqissaassutigimmagu, innuttaasut nunatsinni assigiinngitsumik pineqarnissaat taasinernullu allanut mattunneqarnissaat Naalakkersuisunit isumarineqanngitsoq.

Nunanut allanut Naalakkersuisup Pele Brobergip aviisimi Berlingske Tidendep ilanngutassiaanit, Nunatsinni innuttaasut tamarmik namminersulivinnissamut taasisinnaatitaanersut apeqqusermagu, Múte B. Egede naqqiissuteqartariaqarsimavoq.

- Pele Brobergip oqaaserisimasaata takutippaa, naalakkersuisooqatigiit ataannarsinnaanerisa qanoq qajannartiginera, aviisimi AG-mi politikkikkut oqaaseqartartoq aaqqissuisuunerusorlu Christian Schultz-Lorentzen oqarpoq.

Siusinnerusukkut pisimanngitsoq

Taassuma oqaatigaa, naalakkersuisut siulittaasuata nammineq naalakkersuisuutitaminut naqqiisariaqarsimanera sakkortusoq.

Christian Schultz-Lorentzen
Leiff Josefsen

- Siusinnerusukkut taamatut pisoqarsimaneranik eqqaamasaqanngilanga. Pisup takutippaa Naalakkersuisooqatigiinni naammaginartumik oqaloqatigiittoqartarsimanngitsoq. Brobergip nalunngilluinnarpaa, innuttaasut allatut inuiaassuseqartut taasitsinermut mattunneqarnerat politikkikkut kingunerluutaasinnaasoq. Oqaaserisimasai Naalakkersuisunut tamanut tutsinneqarsinnaapput, taanna oqarpoq.

Sakkortuunik nalunaaruteqartarnerit ajunngitsumik allannguinermik nassataqarsinnaasaraluartut, Pele Brobergi mianersortaqariaqartoq aaqqissuisuuneq isumaqarpoq.

- Naalakkersuisoq nammineq isummersinnaasoq, taamalu atorfilittat isumaannik malinniinnanngitsoq tusarlugu nuannersinnaagaluarpoq. Pele Brobergili naalakkersuisooqatigiinnut ilaavoq. Naalakkersuisooqatigiinnermi avissaartuutsisinissaq pinnagu ataatsimoortitsinissaq akisussaaffigineqartarpoq. Taannali avissaartuutsitsivoq, naalakkersuisooqatigiinnerlu ajoquserinnaallugu. Suut tamarmik killissaqartarput.

Partiip tapersersortaasup Brobergimup tapersiisimanini tunuartippaa

Partiip tapersersortaasup Atassutip sapaatiummat nalunaarutigaa, oqaaserineqarsimasut Pele Brobergimut kinguneqartinneqartariaqartut, aamma Múte B. Egedep Brobergip Naalakkersuisutut inissisimanera eqqarsaatigeqqittariaqaraa. Christian Schultz-Lorentzeni isumaqarpoq, naalakkersuisooqatigiinni akisussaaffigineqartut allanngortinneqassappata pissusissamisuussasoq.

- Pele Brobergip nunanut allanut inuussutissarsiornermullu oqartussaaffiit tigummiarpai. Akisussaaffiit annertuut marluk pingaarutillillu. Suleqatigiilluartoqassappalli ataatsimoortoqartariaqarpoq, Nalerarlu nunanut allanut tunngasutigut akisussaaffeqarnermigut, partiip maluginiarneqarnissaanut sunniuteqarluarnissaanullu politikkikkut tunngavissinneqarsimavoq.

Apeqqutaasorli tassaavoq, Pele Brobergip oqaaserisimasai Naleqqami ilaasortat tamarmiusut isumaqatigineraat.

- Partiip siulittaasuata Hans Enoksenip nalunaaruteqarnissaa aamma amigaatigaarput. Pele Brobergip oqaaseqaataanut isumaqataava isumaqataanngilaluunniit imaluunniiit Pele partiip pisortatigoortumik siunniussimasaanut atatillugu oqaaseqarpa? Oqaaseqannginneq akuersaartutut isumaqataasutullu isumaqartinneqakkajuttarpoq. Tamanna maannakkut pva, IA-p Naleqqallu isumaqatigiinnginnerat suli annerua, Christian Schulz-Lorentzen apeqqusiivoq.

 Amerlanerussutaarussinnaasut

IA-p Naleqqamik suleqateqarnini atorunnaarsissaguniuk periarfissai killeqarput, tassa qinersisoqarnissaanik nalunaaruteqartoqanngippat, aaqqissuisuuneq oqarpoq.

- Siumut Demokraatillu uranimik piiaasoqarnissaata isumaqatigiinngissutaanera pissutaalluni naalakkersuisooqataanngillat. Ikinnerussuteqarluni naalakkersuisuutitaqarsinnaaneq kisinngoruppoq. Partiimik tapersersorteqarluni tamanna ingerlanneqarsinnaavoq.

Siumulli Demokraatilluunniit naalakkersuisooqataatinneqalissappata, uranimut apeqqut isumaqataanngissutaasoq illuartinneqartariaqassaaq. Tamannali ilimanarpallaanngilaq. Naalakkersuisooqatigiit ingerlaannarnissaat ilimanarpoq, ingerlaannassagunilli nukittunerusumik suleqatigiinnissaq eqqarsaatigineqartariaqarluni.

- Massakkut taamatut inissisimasoqartillugu Naleqqap IA ilungersuatippaa, Christian Schultz-Lorentzen oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER