Naalakkersuisooqatigiit ataatsimiititaliani amerlanerussuteqalersut
Asii Chemnitz Narup Mariane Paviasseni ilaasortaaffigisaanik tigusivoq, Atassullu ataatsimiititaliami pissaaneqarfiusumi ilaasortaajunnaarpoq.
Inatsisartut pingasunngormat immikkut ittumik ataatsimiipput, tassani siulittaasup tullissaanik ataatsimiititalianilu ilaasortassanik qinersisoqarnissaa siunertaalluni. Ataatsimiinnerup aallatinneqarnissaa Nuummi innaallagissap qaminnera pissutaalluni kinguaattoorfiuvoq, arfernulli eqqaani aallartissinnaanngorsimalluni.
Naalakkersuisooqatigiit suleqatigiinneranni allanngortoqarnera tassani tunngaviuvoq, ullullu ingerlanerani Atassummit nalunaarutigineqarpoq naalakkersuisooqatigiinnut tapersersortaanermut taarsiullugu illuatungiliuttut partiiannik Demokraatinik suleqateqalertoqarniartoq.
Atassut ukiakkut ataatsimiinnermi maluginiarneqarpoq, Aningaasaqarnermut Akileraartarnermullu Ataatsimiititaliami aamma Inuussutissarsiornermut Aatsitassanullu Ataatsimiititaliami naalakkersuisooqatigiit ikinnerussuteqartilersimagamigit. Siullermik akileraartarnermut inatsimmik allannguiniarluni suliami annertuumi, kingusinnerusukkullu uranimut inerteqquteaqarnissaq pillugu naalakkersuisooqatigiit pingaartitatut suliaanni.
Inuit Ataqatigiit Nalerarlu pingasunngornermi immikkut ittumik ataatsimiittoqarneranut atatillugu iluarsiissuteqarput, tassani ikinnerussuteqaqqilinnginnissaq anguniarlugu ataatsimiititaliani pineqartuni amerlanerussuteqalernissaq isumannaaramikku. Atassut pissaaneqarfiusumi Aningaasaqarnermut Akileraartarnermullu Ataatsimiititaliami ilaasortaatitaqarunnaarpoq, sulili Inuussutissarsiornermut Aatsitassanullu ilaasortaatitaqarluni.
SiumutInuussutissarsiornermut Aatsitassanullu Ataatsimiititaliami ilaasortaatitaaruppoq, Aslak W. Jenseni naalakkersuisooqatigiit partiianneersumit Naleqqamit Emanuel Nûkomit taarserneqarami.
Asii Chemnitz Narup marlunngormat naalakkersuisutut tunuartoq Inatsisartuni ilaasortanngoqqippoq, Atassutillu siulittaasua Aqqalu Jerimiassen Aningaasaqarnermut Akileraartarnermullu Ataatsimiititaliami taarserlugu. Tamatuma saniatigut Mariane Paviasenip atuuffigisai arlallit Asiis Chemnitz Narupiop tiguai. Mariane Paviasen Naalakkersuisunngornerminut atatillugu Inatsisartuni sulinngiffeqarnissamik qinnuteqarsimavoq.
Asii Chemnitz Narup Inatsisartut Siulittaasoqarfianut sinniisussanngorpoq, aamma Inuussutissarsiornermut Aatsitassanullu Ataatsimiititaliami kiisalu Eqqissisimatitsinermut Avatangiisinullu Ataatsimiititaliami siulittaasunngorluni.