Naalakkersuisooqatigiit aningaasanut inatsisissaq isumaqatigiissuteqarfigaat

Isertitassatut naatsorsuutigisat annertusineqarnerat, aalisakkeriviit innaallagissamik imermillu atuinerannut akigititat qaffanneqarnerat aamma suliniutit nutaat sipaaruteqarfigineqarnerat ikiorsiullugit Naalakkersuisut ukiuni sisamani tulliuttuni aningaasanut inatsisissatut siunnersuut amigartoorutitaqanngitsoq saqqummiuppaat.

Coronap martsip qaammataata aallartinnerani ajornartorsiortitsineranut atatillugu aningaasaqarnikkut ingerlanerliornissamik naatsorsuuteqarsimaneq isumalluarnermik taarserneqarsimallunilu ukiuni tulliuttuni akileraarutitigut isertitassatigut kingunerluutaasinnaasut annikillisimanissaannik naatsorsuutiginnittoqarpoq. 2021-mi isertitassatut missingiutiginearsimasut ataatsimut isigalugit 69,8 millioner koruuninik amerlanerulersimapput.

Ilaatigut tamanna tunngavigalugu, aappaagu aningaasanut inatsisissami 183 millioner koruuninik amigartooruteqarnissaq Aningaasaqarnermut Naalakkersuisup siunnersuummini siullermi saqqummiussaa, 76 millioner koruuninut appartinneqarsimavoq.

Aappaagumut aningaasanut inatsisissaq pillugu isumaqatigiissut Siumut, Demokraatit Nunattalu Qitornaasa atsiorpaat.

Aalisakkeriviit imermut innaallagissamullu akiliuteqarnerusalissasut

Tamatuma saniatigut aalisakkeriviit sipaaruteqarnerusalissapput.

Nukissiorfiit kiffartuussinissamut isumaqatigiissutaannut tapiissutit 2021-mi 5,7 millioner koruuninik ikilineqassapput. Tamanna Nukissiorfiit aalisakkerivinnut akiligassanngortissavaat, aalisakkeriviit innaallagissamut imermerullu akigititaviit 41,5 procentiinik akiliuteqartaraluarlutik maanna 50 procentiinik akiliuteqartalissapput.

2021-mi suliniutinut nutaanut konto pingaarnermi 25,8 millioner koruunit pissarsiarineqarsimapput. Tassunga 59,7 millioner koruunit immikkoortinneqarsimagaluarput. Ilaatigut kontomut pineqartumut ilaasunik angallassisarsinermi kiffartuussinissamut isumaqatigiissutit pitsaanerulersinneqarnissaat anguniarlugu, ilinniartut pillugit inatsimmut nutaamut aamma erninermut atatillugu sulinngiffeqartarnerup sivitsorneqarnissaanut aningaasat immikkoortinneqarsimagaluarput.

Aningaasarsiat appartinneqassasut

Sipaarfiusussaq alla tassaavoq allaffissorneq. Ukiut sisamat tulliuttut ingerlanerani katillugit 26,6 millioner koruuninik sipaaruteqartoqassaaq. Sipaarutiginiakkalli annersaat aatsaat 2024-mi atuutsinneqalissapput. 2021-mi 3,7 millioner koruunit tassannga aaneqassapput.

Aappaagumut aningaasanut inatsisissamik naalakkersuisooqatigiit saqqummiussillutik tusagassiortunik katersortitsineranni Vittus Qujaukitsup oqaatigaa, sipaarutissatut pineqartut aqutsisoqarfinni aningaasarsianit qaffasippallaartunit ilaatigut aaneqassasut, aningaasarsiat qaffasippallaarneri misissorneqarlutillu nalilersorneqassapput.

Piffissami 2021-2024-mi katillugit 26,1 millioner koruuninik sinneqartooruteqartoqassaaq, siunnersuummi siullermi katillugit 174,9 millioner koruuninik amigartooruteqartussaagaluarluni.

Powered by Labrador CMS