Naalakkersuisooqatigiinnissamik isumaqatigiissut: Kalaallit Nunaat ajornartorsiornermi imatut aqunneqassaaq
Annertusaarineq suliassaqartitsinerlu kiisalu peqqinnissaqarfimmut suliffeqarfinnullu ajornartorsiortunut ikiorsiinissaq qitiutillugit Kalaallit Nunaat coronap ajornartorsiortitsineranit qaangiitinneqassaaq, Siumut, Nunatta Qitornaasa Demokraatillu naalakkesuisooqatigiinnissamik isumaqatigiissutaanni allassimavoq.
Siumut, Nunatta Qitornaasa Demokraatillu naalakkersuisooqatigiinnissamik isumaqatigiissut saqqummiuteqqammerpaat, taanna qinigaaffiup sinnerani 2020-miit 2022-mut naalakkersuisooqatigiit politikkikkut sulinerannut tunngaviussaaq.
Isumaqagigiissummi siullertut qitiunerpaatullu suliassaq tassaavoq, naalakkersuisooqatigiit coronap ajornartorsiutaanerani Kalaallit Nunaannik qanoq ingerlatsinissaannut tunngassuteqartoq.
Naalakkersuisooqatigiilersut erseqqissaatigaat, peqqinnissaqarfik isumalluutinik pisariaqartitaanik tuniorarneqartuassasoq:
- Napparsimasut isumannaatsuunissaaq nalinginnaasumillu peqqissuuneq qulakkeerneqassaaq, isumaqatigiissummi allassimavoq.
Ajornartorsiorneq Kalaallit Nunaata aningaasaqarneranut ukiuni aggersuni sunniuteqassasoq, Aningaasaqarnermut Naalakkersuisoqarfiup Aningaasaqarnermullu Siunnersuisoqatigiit siumut nalilereernikuuaat.
Annertusaarisarnissaq qitiutinneqassasoq
Partiit naalakkersuisuutitaqartut nassuerutigaat, piffissami aningaasaqarnermik siuariartortitsinissamik anguniagaqarneq piviusunngortikkuminaassinnaasoq, taamaammallu coronap ajornartorsiortitsinerani kinguneqaataasinnaasunik pakkersimaarinninnissaq ukkatarineqarniartoq.
Suliffeqarfiit ajornartorsiortut sulisuilu ikiorserneqarnissamut periarfissaqartinneqassapput, aammali sipaarniartoqassaaq:
- Aningaasaqarnikkut ingerlatsineq attatiinnarneqassaaq, aningaasartuutissanik annertusaarinissamillu ukkataqarluni. Malittarisassat pinngitsoorneqarsinnaanngisut pisariaqartinneqarput, tassa COVID-19-p ajornartorsiortitsineranik sukkulluunniit iliuuseqarsinnaanermut Nunatta Karsia kommunillu akiliisinnaassuseqartinniarlugit, isumaqatigiissummi allassimavoq.
Inuiaqatigiit aningaasaqarnerat unittoortinneqassanngitsoq
Partiit peqatigitiallugu erseqqissaatigaat, inuiaqatigiit aningaasaqarnerat unittoortinneqassanngitsoq:
- Taamaammat partiit naalakkersuisooqatigiit qulakkeerniarpaat, suliassaqartitsinerup aamma nunap immikkoortortaani tamani sammisassaqartitsinerup attatiinnarneqarnissaannut pisariaqartinneqartumik suliniutigineqartut, taammaammat aningaasaliissutit naligiinnerusumik siammarterniarneqarput.
Naalakkersuisooqatigiilersut sulissutiginiakkatik uku taagorpaat:
Atuarfeqarnermik ilinniartoqarfeqarnermillu aaqqissuusseqqinneq
Kulturikkut sammisassaqartitsisarnerup nukittorsarneqarnerata ingerlatiinnarneqarnissaa
Aalisanermut inatsimmik nutarterineq
Piniarnermut aallaaniarnermullu inatsimmik nutarterineq
Illoqarfinni nunaqarfinnilu tunisassiorfinnik annertusaaneq
Sulisoqarnermut inatsimmik aaqqissuusseqqinneq
Kalaallit Nunaata Danmarkillu akornanni aningaasat kaaviaartarnerannik misissueqqissaarneq
Suliassaqarfinnik naalagaaffimmit tigusinissamut piareersarneq
Tunngaviusumik inatsisissamut tunngatillug sulinerup ingerlatiinnarneqarnissaa
Avatangiisinut aningaasaateqarfimmik pilersitsinissaq