isumaqatigiinniarnerit
Naalakkersuisooqatigiinnissamik isumaqatigiinninniartut ataatsimeeqatigiit tupaallannartut
Siumut, Atassut Demokraatillu pingasunngornermi ataatsimeeqatigiipput. Akunnerup affaata missaanni ataatsimeeqatigiipput, ataatsimiiffillu matuneqarmat ersaattaappalupput
- Naalakkersuisooqatigiinnissamik suleqatigiissinnaaneq soorunami eqqartorneqarpoq. Partiinik allanik aamma suleqateqassaagut ualinerani.
Naalakkersuisooqatigiinnissamik isumaqatigiinninniartuni siuttuusoq, Siumup siulittaasua Kim Kielsen, Atassummik Demokraatillu ataatsimeeqatigineqareernerisa kingorna oqarpoq.
Partiinik allanik suleqateqarsinnaaneq suli ammaffigalugu oqaatigaa. Suut eqqartorneqassanersulli oqaatigerusunngilaa. Demokraatit siulittaasuata Anda Uldumip aamma Atassutip siulittaasuata Knud Kristiansenip suut oqallisigisimaneritik aamma annertunerusumik oqaaseqarfigerusunngilaat.
- Oqaaseqassanngilanga, marluullutik taamatut oqarput.
Ataatsimiittoqaqqissanersoq aamma oqaaseqarfigissanngilaat. Siumumik naalakkersuisooqateqarnissartik suli aamma ammaffigaat.
Naleqqap piumasaqaatini attatiinnarpai
Partiit taakku pingasut ataatsimeeqatigiinnginneranni Siumut Partii Naleqqamik Atassummillu ataatsimeeqateqarpoq minutsini 15-ni.
- Siumut kisimi ataatsimeeqatiginissaa piumasaraarput. Piumasaqaatigut isumaqatigiinninniartut aqutsisuannut saqqummiuppagut, Partii Naleqqap siulittaasua Hans Enoksen oqarpoq.
Urani pillugu politikkimi Siumut suli isumaqatigiissuteqarfigineqarsimanngitsoq oqaatigineqarpoq. Uranitalinnik piiaannginnermi misissuilluartoqaqqaarsimanissaa Partii Naleqqamit piumasarineqarpoq.
Innuttaasut peqqissusaat pingaartinneqartariaqartoq oqaatigaat. Aamma ineqarnermut akigitinneqartup appartinneqarnissaa Partii Naleqqamit suli piumasaqaatigineqarpoq.
- Qineqqusaarutiginikuusagut naalakkersuisunngortitsisoqassappat toqqammavigissavagut. Eqqartortukkatta ilaanni immitsinnut ungasissupilussuuvugut, eqqartukkattali ilaanni suleqatigiiffigisinnaasaqarpugut. Qaaqquneqaqqissanersugut suli naluara, Hans Enoksen oqarpoq.
Olsvig neriuuteqarpoq
Inuit Ataqatigiit siulittaasuata Sara Olsvigip Siumumik ataatsimeeqateqareernermi kingorna qungujulalluni anillappoq.
- Amerlasuunik suleqatigiiffisinnaasaqarpugut, taamaattumik ataatsimiittoqaqqinnissaa orniginartippara, Sara Olsvig oqarpoq.
Urani pillugu innuttaasut taasitinneqassasut Inuit Ataqatigiinnit qineqqusaarnermi piumasarineqarpoq.