qinersineq
Naalakkersuisooqatigiinnissamik isumaqatigiinniarnerit: Sorsuutigineqartussat
Ataasinngorpt naalakkersuisooqatigiinnissamik isumaqatigiinniarnissani pingaartumik sammineqassapput aningaasaqarnikkut inissisimaneq, aalisarnerup ineriartortinnissaa ilinniagaqartitsinermilu suliniuteqarnissaq. Tamanna paasinarsivoq Sermitsiaq.AG-p partiinik apersuinerani
Siumup siulittaasuata Kim Kielsenip naalakkersuisooqatigiinnissamik isumaqatigiinniarnerit aqussavai. Taanna neriorsuigaluartoq naalakkersuisooqatigiinnik siammasissunik pilersitsinissaq sulissutiginiarlugu nunalu katersorniarlugu, partiit kissaatigisaminnik piareersimatitsereerput.
Aningaasaqarneq, aalisarneq ilinniartitaanerlu partiit amerlanerpaat samminiarpaat.
– Qularnanngilaq 11-nik ilaasortaatiaqarluta nukittuumik inissisimasugut, uangalu tamanit taaguunneqarnersaagama natsorsuutigaarput isumaqatigiinniarnerni peqataatinneqassalluta, Inuit Ataqatigiit siulittaasuat Sara Olsvig oqarpoq.
IA-p piumasariniarpaa aningaasaqarnikkut inissisimaneq erloqinartoq, naatsorsuutigineqartoq 2014-imi 275 millioner koruuninik landskarsi amigartooruteqassasoq, oqaluuserineqassasoq, aaqqiissutaasinnaasullu isumaqatigiinniarnerni saqqummiunneqassasut.
– Neriorsuinerit naammanngillat, maanna qanoq iliuuseqartoqassaaq, aningaasaqarnikkullu ajornartorsiutit aaqqinniarlugit tamatta akisussaaffimmik tigusisariaqarpugut, Sara Olsvig erseqqissaavoq.
Aamma pissangagaa partiit akimorlugit suleqatigiinnissamik neriorsuineq Siumup naalakkersuisooqatigiinnissamik isumaqatigiinniartitsinerani atuutissanersoq.
– Inuiaqatigiinni avissaartuunneq inuit qatsuppaat. Aningaasaqarneq aalajaatsoq anguniarlugu nunamilu innuttaasut toqqissisimasumik atugaqarnissaat aqqutissiuunniarlugu suleqatigiittariaqarpugut.
Ineqarnermut akiliutit apparneqassapput
Qinersinermi ajugaasup Partii Naleqqallu siulittaasuata Hans Enoksenip, Inatsisartunut pingasunik ilaasortaatitaqalersup, aamma nalunngilaa ataasinngorpat naalakkersuisooqatigiinnissamik isumaqatigiinniarnerni suut piumasariniarlugit.
– Ineqarnermut akiliutit apparneqassapput, aalisarnermut periarfissat ineriartortinneqassapput, taavalu ilinniagaqartitsinermi isumaginninnermilu aaqqissuusseqqittoqassaaq. Taakkua pingaarutitaraavut. Naalakkersuisooqatigiinnissamik isumaqatigiinniassagutta tamakkua aamma sorsuutiginiarpavut.
Ilimagineqarpoq naalakkersuisooqatigiinnissamik isumaqatigiinniarnerni Partii Naleraq aalajangiisuusinnaasoq. Taamaakkaluartoq siulittaasoq tunuarsimaarpoq periarfissinneqaruni oqartussaaffeqarfiit suut tigujumassanerlugit.
– Siulersuisutta isumaqatigiinniarfittalu akornanni isumaqatigiinniarnermi apeqqutaassaaq. Uanga kisima aalajangigassarinngilara, Hans Enoksen oqarpoq.
Taannali isumaqarpoq isumaqatigiinniarnemi pingaaruteqartoq sammisanik suleqatigiiffiusinnaasunik nassaarniarnissaq, minnerunngitsumillu partiit akunnerminni pitsaanerusumik paaseqatigiinnissaat.
– Inatsisartuni oqallittarnerni kingullerni isumaqatigiinngissuterpassuit qasunartarsimapput. Aamma innuttaasut tamanna malugisinnaasimavaat. Sammisanik, suleqatigiiffigisinnaasatsinnik nassaarniartariaqarpugut.
Qaasuitsup Kommunia avinneqassaaq
Atassut Inatsisartunut marlunnik isertitaqarpoq, partiillu siulittaasuata Knud Kristiansenip naalakkersuisooqatigiinnissamik isumaqatigiinniarnerni kissaatigisani piareersimavai. Atassutip isumaqatigiinniarnerni piumasariniarpaa Qaasuitsup Kommunia avinneqassasoq.
– Aamma qineqqusaarutigisimavarput aalisarnerup ataqatigiinnerusumik ineriartortinneqarnissaa. Tunumi Avannaanilu saarullinniarneq annertuserusupparput. Taavalu Pinngortitaleriffik amerlanerusunik atugassinneqassaaq, misileraalluni aalisarneq annertunerusoq ingerlanniassagatsigu.
– Aperineqassaguit oqartussaaffeqarfiit sorliit tigorusussavigit?
– Tamanna siulersuisut aalajangissavaat. Kisimiillunga piumasaqarsinnaanngilanga. Siulersuisut tamatumunnga pisinnaatitsissummik tuneqqaassavaannga.
– Kim Kielsen qanoq siunnersorusuppiuk?
– Silatusaassaaq eqqarsarluarlunilu, Knud Kristiansen oqarpoq.
Naalakkersuisooqatigiit siammasissut
Siumup siulittaasua oqaaseqarusuppallaanngitsoq Sermitsiaq.AG-p arfininngormat naapippaa. Isertuutinngilaali Siumup sulissutiginiara siammasissumik naalakkersuisooqatigiit.
– Oqarsimavugut siammasissumik naalakkersuisooqatigiinnissaq kissaatigigipput. Isumaqatigiinniarnerilli qanoq inerneqassanersut oqaatigineqarsinnaanngilaq, Kim Kielsen oqarpoq.
Akerlianik isumaqarpoq pingaaruteqartoq suleqatigiiffiusinnaasunik nassaarniarnissaq.
– Pingaartinniarpavulli aalisarneq, ilinniartitaaneq, ineqarneq isumaginninnerlu. Inuussutissarsiutit tamaasa ingerlatilissavagut aningaasaqarnermut pitsanngorsarniarlugu, Kielsen oqarpoq.