Skip to main content

Naalakkersuisooqatigiilersut sulissutiginiagaat

Inuit Ataqatigiit Siumullu naalakkersuisooqatigiinnissamik isumaqatigiissutigisimasaat Inatsiartuni amerlanerussuteqarluartitsilersoq ullumi saqqummiunneqarpoq. Naleraq naalakkersuisooqataajunnaarpoq.

Inuit Ataqatigiit Siumulu naalakkersuisooqatigiinnissamik isumaqatigiissuteqarput.

IA-mi Naalakkersuisunullu siulittaasuusoq Múte B. Egede Siumumi siulittaasoq Erik Jensen peqatigalugu ataasinngornermi apriilip sisamaani tusagassiortunik katersortitsigamik taamatut ilisimatitsissuteqarput.

Naleraq taamaalilluni naalakkersuisooqataajunnaarpoq, Siumukkormiulli Naalakkersuisut issiaviisa ilaannut igissinnaanngorlutik.

- Qangali maluginiarneqanngitsoorneqarsimanavianngilaq Nalerarlu politikkikkut immitsinnut ungasilliartuinnarsimasugut. Suleqatigisimanerannut qujaffigerusuppakka. Maannail innuttaasunut atugassarititaasut pitsaanerulersinneqarnissaat qulakkeerniarlugu suleqatigiinnissamik nutaamik isumaqatigiissuteqarpugut, Naalakkersuisut Siulittaasuat Múte B. Egede tusagassiortunik katersortitsinermi oqarpoq.

Amerlanerussuteqarlualersut

Inuit Ataqatigiit Siumukkormiullu Naalakkersuisooqatigiilernerisigut Inatsisartuni amerlanerussuteqarluartoqalerpoq. Partiit taakku marluullutik Inatsisartuni ilaasortanit 31-usunit 22-nik ilaasortaatitaqarput.

IA Siumulu sapaatip-akunnerata naanerani nutaamik isumaqatigiissusiorsimapput, isumaqatigiissullu ullumi ataasinngornermi saqqummiunneqarluni.

- Inatsisartuni amerlanerussuteqarluartoqalermat imaanngilaq ikinnerussuteqartut suleqatigineqarnissamut mattunneqartut. Siammasissumik suleqatigiittoqarnissaa anguniagaraarput. Inuiaqatigiit tamaasa, aamma IA-kkunnik Siumukkormiunillu taasisimanngitsut sullikkusuppavut. IA-p suleqatigiinnissamik piumsaqarluni assamminik isaassinera qujaffigaara, Siumumi siulittaasoq Erik Jensen oqarpoq.

Naalakkersuisut Siulittaasuata Múte B. Egedep ilisimatitsissutigaa, Naalakkersuisunngortinneqartut marlunngornermi Inatsisartut ataatsimeeqqilerpata saqqummiunneqassasut. Peqatigitillugu Siumup Inatsisartuni Siulittaasuuffik tigussavaa, siulittaasuuffik Naleqqameersumit Hans Enoksenimit maannamut tigummiarneqarsimavoq.

Nuna nunallu inui pillugit

Isumaqatigiissummut nutaamut qulequtsiunneqarsimavoq "Nuna nunallu inui pillugit".

Tunngaviusutut suleqatigiinnissamik isumaqatigiissummi IA-mit S-imillu tusagassiortunik katersortitsinermi saqqummiunneqartumi atuarneqarsinnaavoq, suleqatigiilersut innuttaasut kiffaanngissuseqarnerulernissaat amerlanerit sulilernissaat utoqqaallu pitsaanerusunik atugassaqartinneqalernissaat sulissutiginiaraat. Utoqqalinersiutillit pillugi tinatsit nutaaq kingusinnerpaamik 2023-mi  upernaakkut Inatsisartunut saqqummiunneqassaaq.

Suleqatigiilersut politikkikkut aalajangiiffigisassat annertuut eqqarsaatigalugit naapeqatigiissimapput.

Suleqatigiilersut isumaqatigiissutigisimavaat, uranimut apeqqut ullumikkut atuuttutut sammiveqartinneqassasoq, apeqqullu allanngortinneqassappat aatsaat inuiaqatigiit taasinermikkut tamanna naqissusissagaat.

Erik Jensenip tusagassiortunik katersortitsisoqarnerani oqaatigaa, suliaq pineqartoq partiiminni naammassineqarsimasoq, piffissamilu qaninnerusumi innuttaasut taasitinneqarnissaanik anguniagaqarniaratik. 

Naalakkersuisut parisimi isumaqatigiissummut ilanngunnerup innuttaasunut sunniutigisinnaasai misissoqqissaarniarpaat, misissueqqissaarsimanerlu 2022-mi ukiakkut ataatsimiinnermi Inatsisartuni ilaasortanut agguaanneqassasoq oqaatigalugu.

Isumaqatigiissut

Suleqatigiilersut sapaatip-akunnerata naanerani pingaarnerutitat arlallit isumaqatiginninniutigisimavaat.

Suleqatigiinnissamik isumaqatigiissummit tigulaakkat ilagaat:

  • Takornariaqarnermut inatsisissaq ilusilersorneqassasoq
  • Naalakkersuinikkut ammasumik ingerlatsisoqassasoq
  • Namminersorlutik Oqartussat allaffissuanni kalaallisut oqaatsit salliutillugit atorneqassasut
  • Innuttaasut kiffaanngissuseqartinneqassasut
  • Aalisarneq pillugu inatsisissaq innuttaasunik peqataatitsilluni ingerlateqqinneqassasoq
  • Naalakkersuisut namminersulivinnissamik suliaqarneq ingerlatiinnassagaat
  • Sumi inunngorsimaneq, arnaaneq, angutaaneq aamma qanoq
    upperisaqarneq apeqqutaatinnagit innuttaasut naligiimmik pineqassasut

Suleqatigiilersut erseqqissaassutigaa, suleqatigiissutissatut isumaqatigiissummi taaneqartut saniatigut allanik arlalinnik suliassaqartoqartoq qinigaaffiup sinnerani isumagineqartussanik. Erik Jensenip tassunga atatillugu nassuiaatigaa, suliassat allat soorlu peqqinnissaqarfimmut ilinniartitaanermullu tunngassuteqartut isumagineqarnissaat suleqatigiilersut isumaqatigiissutigisimagaat.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER