marloriaammik pisassiineq

Naalakkersuisooqataasut Karl-Kristian Kruse akerlilerpaat

Imminut iluareqqusaarneruinnarpoq naalakkersuisooqatigiinnissamillu isumaqatigiissummik unioqqutitsinerulluni, aalisarnermut naalakkersuisoq biologit inassuteqaataannit marloriaataa sinnerlugu saarullittassiimmat, Demokraatit siulittaasuata tullia politikkikkullu oqaaseqartartuat oqarpoq

Demokraatit siulittaasuata tullia Randi Vestergaard Evaldsen

Demokraatit siulittaasuata tulliata politikkikkullu oqaaseqartartuata Randi Vestergaard Evaldsenip, ullumi sisamanngornermi siulersuisuunernut ilaasortaq Demokraatillu Inuusuttaanni siulittaasoq Rasmus Dalsgaard Andersen, tamanut ammasumik taperserpaa, taassuma partiip inuussuttaanni siulittaasup tullia Henrik Thomsen peqatigalugu aalisarnermut politikki ingerlanneqartoq isornartorsiormagu.

– Saarulliit amerlassusaannik paasissutissiissutit pimoorunneqassapput - taamatuttaarlu aalisarnermut, piniarnermut nunalerinermullu naalakkersuisutut atorfik aamma pimoorunneqassaaq, Randi Vestergaard Evaldsen tusagassiorfinnut nalunaarutikkut oqarpoq.

Uungaannaq isigisumik iliuuseqartarpugut
– Neriuutigisimagaluarparput naalakkersuisup, naalakkersuisup suliassai isumagisinnaassagai, nassuerutigisariaqarparpulli taamaattoqanngitsoq. Nassuerutigisariaqarparput Kalaallit Nunaanni uungaannaq isigisumik pilersaarusiortarneq sungiussimagipput, eqqarsartariaaserlu tamanna qimassavarput.

– Saarulleqassusia piffissamut sivisunerusumut qulakkeerneqartariaqarpoq, kingulissatta aamma saarulliit iluaqutiginiassammatigit, Inatsisartunut ilaasortaq oqarpoq.

Taanna Demokraatineersullu allat marluk taamatut isornartorsiueqataalerput, Atassummeersup Inatsisartunut ilaasortap Steen Lyngep isornartorsiuinerata kingorna.

Politikerit taakkkua sisamat ersissutigaat kingulissavut saarullittassaarutsinneqassasut, Naalakkersuisut biologit inassuteqaataasa akerlianik iliuuseqartarpata.

Isornartorsiuineq pilerpoq aalisarnermut naalakkersuisoq Karl- Kristian Kruse, Siumut, qanittukkut 25.000 tonsinik saarullittassiimmat, taakkualu biologit inassuteqaataannit 12.000 tonsinit marloriaataa sinnerlugu amerlanerupput.

Randi Vestergaard Evaldsenip, Demokraatini siulittaasumut tulliunermi politikkikkullu oqaaseqartartuunermi saniatigut Inatsisartut Kukkunersiuinermut Ataatsimiititaliaanni siulittaasuusup Aatsitassanullu Ataatsimiititaliami siulittaasup tulliata, Rasmus Dalsgaard Andersenitulli tikkuarpaa, naalakkersuisooqatigiinnissamik isumaqatigiissummi arfinilinnik quppernilimmi allassimasoq aalisarneq piujuartitsinissamik tunngaveqassasoq.

Randi Vestergaard Evaldsenilli inuusuttaasalu politikeriata Karl-Kristian Kruse aamma isornartorsiorpaat avaleraasartoortassat qanoq agguaanneqarsimanerannik.

Kukkusaqattaarnerit

Avaleraasartoortassanik agguaassineq qaammatini kingullerni isornartorsiorneqartarsimavoq kigaappallaartutut paamaarunneqarpallaartutullu, naammassineqatuakasimmallu qanigisanut agguaassinertut taaneqarluni.

– Naalakkersuisuulluni misilittagaqanngitsoq, ataasiarluni kukkuneq ajunngilaq. Tamanna paasisinnaalluarpara. Kukkusaqattaartoqarpalli imaassimassaaq suliassaq paatsoorneqarsimasoq, taamalu naalakkersuisutut atorfik paatsoorneqarsimasoq.

– Avaleraasartuut assersuutigissagutsigit kikkut pisassinneqassanersut kikkullu pisassinneqassannginnersut siunertaqarpasinngilaq.

Nalaatsornerinnarmik kigaatsumillu

Randi Vestergaard Evaldsenili isumaqarneruvoq avaleraasartuunut tunngatillugu piginnaassuseqannginneq atugaanerusimasoq, qanigisanut tunioraanerunerminngarnit.

– Allaannginnami terningit qummut milorujutiinnariarlugit, taakku najoqqutaralugit tunioraasoqarsimasoq, tamanna akuerineqarsinnaanngilluinnarpoq. Suleriuseq allanngortittariaqarpoq iluamillu pilersaarusiortoqartarluni. Naalakkersuisuuneq tatigisatut atorfiuvoq, Randi Vestergaard Evaldsen allappoq.

Aalisarnermut, piniarnermut nunalerinermullu Naalakkersuisoq akisussaasoq Karl-Kristian Kruse Sermitsiaq.AG-p manna tikillugu apersorniarsimagaluarpaa, kinguneqanngitsumilli.

Namminersorlutik Oqartussat nalunaarutigaat taanna suliffimminut atatillugu angalasoq, Siumumiillu nalunaarutigineqarluni Malta-miittoq.

Powered by Labrador CMS