Naalakkersuisiut salliutitaat siulleq iluatsinngitsooratarsinnaasoq
Naalakkersuisoqatigiilersut uumasunut nakorsaqarfik inuussutissalerinermullu oqartussaaffik angerlaanniarpaat, siuliisa tamanna iluatsinngilaat: – Suliassaqarfiup akisussaaffigalugu nammannissaa annertuumik pisariaqartitsiffiuvoq, Jens Immanuelsen 2019-imi nassuerpoq.
Namminersorlutik Oqartussat 2009-mi eqqunneqarneraniilli naalakkersuisoqatigiinnissamut isumaqatigiissutigineqartut tamarmik danskit naalagaaffiannit suliassaqarfinnut akisussaaffinnik angerlaassuinissamik imaqartarput.
Taakkua arfineq-aappaat ”Nammaqatigiinneq – Patajaassuseq – Siuariartorneq”, Inuit Ataqatigiinneersup Múte B. Egedep aamma Naleqqameersup Hans Enoksenip tallimanngornermi maajip 16-anni atsiugaat aamma taamatut imaqarpoq, aviisi Sermitsiaq allappoq.
– Naalakkersuisoqatigiit inuussutissalerinermut oqartussaaffiup piffissami uani qinigaaffimmi angerlaanneqarnissaanut sulinerup aallartinneqarnissaa isumaqatigiissutigaat.
Suliassaqarfiit 33-t
Taamatut anguniagaqarneq Atassutip siulittaasuata Aqqalu C. Jerimiassenip nuannaarutigaa, taassuma 2018-imili qinersisoqarneranit suliassaqarfiup akisussaaffigineqarnerata inissinneqarnissaanik erseqqissaasoqarnissaa sulissutigaa, kisianni siornatigut angerlaassuinernit misilittakkat akisuut eqqarsaatigalugit mianersorpoq.
– Naalakkersuisoqatigiit anguniagaata piumasaqaatigut marluk naammassivaat. Naalakkersuisut namminersorneq pillugu inatsimmi allattorsimaffimmi inuussutissalerinermut suliassaqarfik siullertut salliutippaa, kisianni tigusineq ilisimatitsissutitalimmik tunngaveqassaaq, taamaalilluta aningaasatigut sulisutigullu aningaasartuutit tiguniakkagut ilisimassagatsigit, Aqqalu C. Jerimiassen Sermitsiamut oqarpoq.
Namminersorneq pillugu inatsisip Nunatta suliassaqarfiit katillugit 33-t tigusassai taakkartorpai, kisianni aatsitassanut suliassaqarfik sullivinnillu avataani nakkutilliisoqarfik taamaallaat maannamut angerlaanneqareerput, tamannalu 2010-mi januaarip aallaqqaataani pivoq. Kigaatsumik tigusinermut aalajangiisumik pissutaasut ilagaat, Namminersorlutik Oqartussat Namminersornerullutik Oqartussat naalagaaffimmit tapiissutitaqartut akerliannik, Namminersorlutik Oqartussat siunissami ingerlatsinermut namminneq akiliisussaanerat. (Qineqqusaarnermi Nunatta Qitornaasa oqartussaaffiit tamarmik tiguneqarnissaat ukiumut 1,1 milliardit koruuninik akeqassangatinnerarpaat).
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: