Ataatsimiinneq

Naalakkersuineq aamma aalisakkat oqaluuserineqarput

Danmarkip statsministeria, Savalimmiuni lagmand aamma Nunatsinni Naalakkersuisut siulittaasuat naalagaaffeqatigiiullutik ataatsimiipput

Nalagaaffiit ataatsimiinneranni peqataasut. Saamimmit: Savalimmiuni lagmand, Aksel V. Johannesen, Ministeriuneq Lars Løkke Rasmussen aamma Naalakkersuisut siulittaasuat, Kim Kielsen

Ministeriuneq Lars Løkke Rasmussen, lagmand Aksel V. Johannesen aamma Naalakkersuisut siulittaasuat Kim Kielsen ullumi 14. december 2015 ukiumoortumik naalagaaffeqatigiit ataatsimiinneranni naapeqatigiimmata oqaluuserisassat annertuut marluk oqaluuserineqarput.

Ataatsimiinneq ukioq manna ministeriunerit najugaqarfigisartagaanni Marienborgimi ingerlanneqarpoq.

Oqaluuserisap aappaa naalakkersuinikkut aaqqissuussinermik suliamut tunngavoq. Savalimmiut aammalu Kalaallit Nunaata tungaannit tamanna politikkikkut oqaluuserisassaniippoq.

Atuaruk: Kalaallit Nunaata tunngaviusumik inatsisissaa qaninnerulaalerpoq

Neriulluarnartoq
Inatsisartuni amerlanerussuteqartut ataatsimiinnermi kingullermi aalajangiipput, Inatsisartut tunngaviusumik inatsisissamut piareersaataasussamik 2016-mi isumalioqatigiissitamik pilersitsisoqassasoq. Saniatigullu savalimmiuni inatsisartut kissaatigaat, savalimmiut tunngaviusumik inatsisissaanut innuttaasunik 2017-mi taasititsisoqassasoq.

- Aamma Savalimmiut Kalaallit Nunaatalu nunatut naalakkersuinikkut aaqqissuussinermik suliaqarnerannut tunngatillugu neriulluarnartumik oqaloqatigiippugut, Ministeriuneq suliaqarnermi tassani kissaatigineqassappat ikiuunnissamik neqerooruteqarluni, Kim Kielsen tusagassiorfinnut nalunaarummi ilisimatitsivoq.

Soqutigisat assigiinngitsut
Apeqqutip aappaa eqqartorneqartoq tassaavoq, Kalaallit Nunaat aamma Savalimmiut nunani tamalaani aalisarnermut ingerlatsivinni aqutsinermut kattuffinni suleqatigiinneq oqallisigineqarpoq.

Tassunga atatillugu Danmarkip Savalimmiut aamma Kalaallit Nunaat sinnerlugit peqataavoq, naalagaaffiit ilaasortaasut ataasiakkaat taasisoqartussanngoraangat tamarmik immikkut ataasiinnarmik taasisinnaapput.

- Ataatsimoorluta isumaqatigiippugut taakkununnga atatillugu oqaloqatigiittarnerit suleqatigiinnerlu nukittorsarneqassasut, Kim Kielsen ilanngullugu oqarpoq.

Kalaallit Nunaat 2016-mi
aalagaaffeqatigiit ataatsimiinnerat ukioq manna Kalaallit Nunaanni ingerlanneqartussaasimagaluartoq, danskit aamma Savalimmiormiut qinersinerat pissutigalugu kinguartinneqarsimavoq. Taamaattoq suleqataasut ukiumoortumik naalagaaffeqatigiit ataatsimiittarnerat pillugu tunngaviusup attatiinnarnissaa kissaatigisimavaat, Ministeriuneq tikeraartitsisuutillugu naalagaaffeqatigiit ataatsimiinnerat ingerlatissallugu isumaqatigiissimallutik.

2016-imi Naalagaaffeqatigiit ataatsimiinnissaat Kalaallit Nunaanni ingerlanneqassaaq.

Atuaruk: Naalagaaffeqatigiinni naalakkersuisut ataatsimiinnissaagaluat taamaatinneqartoq

Powered by Labrador CMS