Naalagaaffiup sinniisaa: Nammineersinnaassuseqarpunga

Qanoq isumaqarnerlunga aningaasaqarnermut ministeeriaqarfik apereqqaartariaqanngilara, Kalaallit Airports Internationalimi naalagaaffiup sinniisaa Merete Eldrup oqaluttuarpoq

Merete Eldrup siulersuisuni ilaasortatut inuussutissarsiuteqarniarluni danskit TV-qarfianni TV2-mi pisortaanertut tunuaqqammersoq, angerlarsimaffiani Østerbromi Københavnimiittumi oqarasuaataa sianersimavoq.

Tassaana Danmarkimi aningaasaqarnermut ministeriusimasoq Kristian Jensen (V) sianertoq. Sianerpoq tusarusullugu Eldrup Kalaallit Airports Internationalip siulersuisuini naalagaaffiup sinniisaatut atuunnissamik soqutiginninnginnersoq.

- Ingerlaannaq angerpunga. Taamanikkut Kalaallit Nunaannut tunngatillugu ilisimaqarpallaanngikkaluarlunga, nunarsuarmi qeqertat annersaat alutoriuaannarsimavara. Peqatigitillugu Kalaallit Airports Internationalip siulersuisuni ilaasortatut atuulluarsinnaasutut imminut takusinnaavunga, nunarsuarmi najugaqarfiit inukinnerpaat ilaanni attaveqaatitigut ineriartortitseqataasinnaallunga misigisimallunga, Merete Eldrup oqarpoq.

Suliffeqarfik immikkuullarilluinnartoq

Merete Eldrup taamaammat Kalaallit Airports Internationalip siulersuisuini ilaasortassatut 2019-imi maajip arfineq-aappaani ataatsimeersuartoqarmat toqqarneqarpoq, siulersuisuni ilaasortaaqatigilerlugit Marlene Haugaard, Aviâja Lyberth Lennert, Jákup Sverri Kass, Finn Gaarsmand, Jóhannus Egholm Hansenilu siulittaasoralugu.

- Suliffeqarfiuvoq immikkuullarilluinnartoq, taamaammat timmisartoqarfiliornissamik aalajangiinernut tunngaviusut paasiniarlugit piffissarujussuaq atorsimavara – ilisimaarilluinnarparalu ingerlatseqatigiiffiup Kalaallit Nunaanni inuiaqatigiinnut pingaaruteqarluinnarnera.

- Siulersuisuni ilaasortatut ataasiinnarmik pisussaaffeqarpugut. Tassalu suliffeqarfiup pisariaqartitaanik isumaginninnissaq, Kalaallit Airportsimulli tunngatillugu ingerlatseqatigiiffiup inuiaqatigiinnut pingaaruteqassusaa aamma paasillugulu eqqarsaatigisariaqarparput, taamaammat Kalaallit Nunaanni timmisartoqarfinnik annertusaaniarluni aalajangertoqarsimanernut tunngaviusut sulinissannut pingaaruteqarluinnartussaapput.

Aningaasaqarnermut ministeeriaqarfimmut aperisarianngitsoq

Merete Eldrupip naalagaaffimmut sinniisuunera siulersuisuni sulineranut sunniuteqanngilaq.

- Imaanngilaq aningaasaqarnermut ministeeriaqarfimmukartariaqartunga qanoq isumaqarnerlunga paasiniarlugu. Inuttut toqqagaavunga – aningaasaqarnermullu ministeeriaqarfimmik arlaannik oqaloqatigiissutissaqartoqarpat siulersuisut ataatsimoorlutik oqaaseqartussaallutik. Soorlu Kalaallit Airportsimik piginnittut allat, Naalakkersuisut oqaloqatigineqarniaraangata taamatorpiaq ataatsimoorluta pisartugut.

- Tassa pissutsit taamaapput. Aningaasaqarnermut ministeeriaqarfiup suliffeqarfimmut tunngatillugu eqqortumik iliuuseqarnissara tatigisariaqarpaa – tatiginngikkuninnga allamik taarsertariaqarpaannga, Eldrup oqarpoq.

Aktiaatileqatigiiffinni piginnittut assigiinngitsut sinniisuutitaqartarnerat nalinginnaasuuvoq. Sumiiffinni amerlanerni taamatut ingerlatsisoqartarpoq, Eldrup ilaatigut Rambøllimi, Nykreditimi Rockwool-fondenimilu siulersuisunut ilaasortaasoq oqaluttuarpoq.

Eldrupip oqallinneq paasisinnagaa

- Siulersuisut arlaannaannulluunniit pituttorsimasussaanngillat ilisimasaqarluartutullu siulersuisuni ilaasortatut ataatsimoortussaallutik, suliffeqarfiup anguniagaanik aallartitsisinnaasut attassisinnaasullu, Merete Eldrup, Namminersorlutik Oqartussat ingerlatseqatigiiffiutaanni siulersuisut qanoq katitigaanerat pillugut akulikittumik oqallittoqarneranik paasinnissinnaasoq oqarpoq.

- Ingerlatseqatigiiffiit inuiaqatigiinnut pingaaruteqarluinnarmata tamanna pissusissamisuuginnarpoq, taamaammat taamaattoqartarnera ajorinngivippara. Suliaq naammassillugu tunniuttussaavarput – piumasaqaallu taanna naammassisimanngikkipput isumaqartorpat, oqarnittuut taarserneqarsinnaavugut.

Merete Eldrup 56-inik ukioqarpoq cand. polit.-itullu ilinniagaqarluni. Før direktørposten i TV2-mi pisortaanerunngikkallarami kingusinnerusukkullu siulersuisuni ilaasortaasanngikkallarami JP/Politikens Husimi pisortaasimavoq, Energistyrelsenimi pisortamut tulliusimavoq Aningaasaqarnermullu ministeeriaqarfimmi ministerimut allatsitut sulisimalluni.

Powered by Labrador CMS