Naalagaaffiup niviarsiunera innarlerpaa
1960-ikkut naalerneranni Grønlandsministeria Kalaallit Nunaanni naartunaveersaarnissamut annertuumik iliuuseqarpoq. Arnarpassuit niviarsiallu inuusuttuaqqanut allaat tusindilikkaat spiralilerneqarput. Naja Lyberth aamma Maria Nielsen taakku ilagaat, tamannalu inuunerisa sinneranut sunniuteqarpoq.
Naja Lyberthip atuarfimmi klassi ataaseq allorpaa taamaattumillu atuaqatiminit ukiumik ataatsimik ukiukinnerulluni. Taamaattumik ullormi pineqartumi klassimini niviarsiaqqat allat peqatigalugit Maniitsumi atuarfimmi nakorsap misissuinerani spiralilerneqassalluni paasitinneqarami 14-iinnarnik ukioqarpoq, aviisi Arnanut allappoq.
- Nakorsaq oqaannarpoq: Napparsimmaviliassaatit spiralilertillutillu. Imaanngilaq periarfissaasoq, oqarpoq
Tamatuma angajoqqaaminut oqaatiginissaa qunugaa, peqquneqarninili malillugu iliorluni. Niviarsiaqqat allat peqatigalugit aqaguani napparsimmaviliarput, tulleriiaarlugit qaaqquneqartarlutik spiralilerneqarlutillu. Naja taamanikkut atoqateqarsimanngisaannarpoq.
- Naalagaaffiup niviarsiunera innarlerpaa, oqarpoq
Najap kingusinnerusukkut paasivaa tamanna siusippallaamik naartulersinnaaneq pinngitsoortinniarlugu Grønlandsministeriap nuna tamakkerlugu suliniutaata ilagigaa.
Najap ulloq taanna spiralip ikkunneqarnera puigunngisaannarpaa.
- Eqqaamavara illermi nalallunga nakorsaaneq peqqissaasorlu saninniittut. Illiakkut anniarnera eqqaamavara. Nuanniitsupilussuuvoq, Naja kingorna tarnip pissusaanik kingunerluutinillu katsorsaasartutut ilinniarsimasoq oqaluttuarpoq.
Kingunerluutinik katsorsaanermik suliaqarnermini paasivaa nammineq ukiorpassuit matuma siornatigut illermi misigisaminik kingunerluuteqarluni.
Meeqqat ukioqatigiit 15-it
Naligiissitaanermut siunnersuisoqatigiit siulittaasuata Kathrine Bødkerip 60-ikkunni spiralilersuinerit oqaluttuassartaa ilisimalluarpaa.
- Ukioqatigiiaat ilagaannga meeqqiorfiunngingajannerup nalaani. Paamiuni meeqqat atuarfiani ukioqatigiiaat 15-iuvugut, oqaluttuarpoq.
Allaaserisaq tamaat Arnanut-mi atuaruk.