Naalagaaffiup mittarfiliornissanut aningaasaliinera siulleq qulakkeerpoq

Danmarkip naalagaaffiata Kalaallit Airport International A/S-imut piginneqataanerminut atatillugu siullermeerluni aningaasaleeqqammerpoq. Marlunngormat 75 million koruuninik aningaasaleeqqaarpoq

Danskit naalagaaffiata mittarfiliornissanut katillugu 700 million koruuninik aningaasaliisussaavoq, aningaasaliinerlu siulleq 75 million koruuninik naleqartoq aningaasaliissutigineqartoq Kalaallit Airportsimi siulersuisuni siulittaasoq Jóhannus Egholm Hansenip ingerlatseqatigiiffiup ataatsimiinnerani ilisimatitsissutigaa.

- Danskit naalagaaffianit aningaasanik taarsigassat aamma inissipput. Nordiske Investeringsbankip 450 million koruuninik taarsigassiinissaasa tigunissaat suli qulakkiivinngilaq, siulersuisunut siulittaasoq ilisimatitsivoq.

Mittarfiliornissanut atatillugu suliaqarnissamut neqerooruteqartoqarsinnaavoq maajip 31-ata tungaanut. Sanaartornerit septembarimi aallartinneqassasut siunertarineqarpoq.

Pissangassut
- Sanaartuinissanut naligititarput ataallugu qulaalluguluunniit neqerooruteqartoqassanersoq pissangagaarput, Jóhannus Egholm Hansen oqarpoq.

Suliffeqarfiit sanaartortussat assigiinngitsunik marlunnik neqerooruteqarsinnaasut ilisimatitsivoq. Nuummi Ilulissanilu mittarfiit ataatsikkut tallineqarnissaat imaluunniit kittaartumik sanaartuineq.

- Neqerooruteqartoqareerpat aalajangissavarput suna uagutsinnut iluaqutaanerpaassanersoq, ilisimatitsivoq.

Qinersinissaq eqquissanngilaq
- Lars Løkke Rasmussenip qinersititsinissamik suaaruteqannginnerani ataatsimiittoqarpoq, taamaasilluni tamanna qineqqusaarnermi eqqartorneqarsinnaassanani, oqarpoq.

Inatsisartunut qinersineq ukioq kingulleq suliamut ukiumik ataatsimik kinguartitsisoqartariaqarsimasoq Jóhannus Egholm Hansenip oqaatigaa.


Ataatsimiinnermi Nuummi mittarfiliornissap inissisimaffissaa eqqartorneqanngilaq.

Powered by Labrador CMS