Naalagaaffiup aningaasaateqarfia 1 millioninik tapiivoq

Den Grønlandske Fond 2015-ini pilersinneqartoq, Kalaallit Nunaannit Danmarkimiillu qinnuteqartunut 1 million koruuninik agguaavoq.

Suliniutit suut tapiiffigineqarsimanersut, aningaasaateqarfiup erseqqissumik ilisimatitsissutiginngilai. Kisianni assersuutigalugu atuartut angalanissaat, aasaanerani tammaarsimaarnerit, atuakkanik saqqummersitsinerit, isiginnaartitsinerit aamma eqqumiitsulianik suliat pineqarput.

Den Grønlandske Fond Det Kongelige Grønlandsfondip aamma Dansk- Grønlandsk Kulturfondip kattunnerisigut.

Atuaruk: Aningaasaateqarfik Ivalo & Minik legatinik pingasunik tunniussivoq

Najukkami atugaanerulerniassammat
Kattunnermut pissutaasoq aningaasaateqarfiit taakku marluk siulersuisuinit aalajangiunneqartoq tassaavoq aningaasaateqarfiup najukkami atugaanerulersinneqarnissaanik kissaateqarneq allaffissornermullu nukinik atuineq annikillisinniarlugu.

Aningaasaateqarfiup ilaatigut tapiissuteqarfigisinnaavai Kalaallit Nunaanni ikiuiniarnikkut, ilisimatuussutsikkut kulturikkullu Kalaallit Nunaanni Kalaallillu Nunaata avataani siunertarineqartut aamma Kalaallit Nunaata naalagaafeqartigiiffiullu ilaata sinnerata akornanni kulturikkut atassuteqaqatigiiffiit siuarsaavigineqarnissaat.

Umiuneq
Aningaasaateqarfiup aammattaaq tapiissuteqarfigisinnaavai kalaallit Danmarkimi ilinniagallit aamma m/s Hans Hedtoftip umiuneratigut ajunaarsimasut qimatarisimasaannut aningaasatigut ikiorserneqartariaqartut.

Aningaasaateqarfiup siulersuisui tassaapput naalagaaffiup sinniisua (siulittaasoq), ilaasortaq ataaseq Naalakkersuisunit toqqarneqartoq kiisalu ilaasortat marluk Inatsisartunit toqqarneqartut. Siulersuisut massakkorpiaq tassapput Søren Hald Møller, Jane P. Lantz, Ruth Heilmann aamma Mikaela Engell. Allatseqarfittut suliassat Naalagaaffiup Sinniisoqarfianit isumatigineqartarput.

Akuerineqartut 27-t
Ataatsimiinnermi siullermi qinnuteqaatit 58-it suliarineqarput taakkunanngalu 27-it tapiissuteqarfigineqarput.

Aningaasaateqarfimmiit aningaasanik ukiut ataasiartumik agguaassisoqartarpoq. Tullianik qinnuteqarnissamut ulloq killiliunneqartoq tassaavoq 1. februar 2017