Naalagaaffik qitornannik arsaarinnikkaangat
Kalaallit ilaqutariit Danmarkimiittut amerliartuinnartut misigisarpaat inunnik isumaginninnermik oqartussaasunit paatsoorneqartarneq. ”Marie” tupakuluuseqarluni napparsimalerpoq, piffissamilu sivikitsuinnarmi Københavnip Kommunianit anaanatut naleqqutinngitsutut nalilerneqarluni. Qaammatini arfineq-marlunni ilungersorpoq ernermi tigoqqinnissaata tungaanut. Ullumikkut Nuummi najugaqarput.
Inissiami Nuummi arnaq inuusuttoq erninilu najugaqarput. Ilisimatusarfimmi ilinniartuuvoq erneralu meeqqerivimmiittarluni. Eqqissisimallutik inuupput. Kisianni taamaattuaannarsimanngilaq. Ukiut marlussuit qaangiupput danskit oqartussaasut erneranik arsaarmassuk. Suliaq taassumunnga tunngasoq ajunngilaq, kisianni aammattaaq assersuutissaavoq pisumut amiilaarnartumut isumaginninnermik suliaqartut saassutarinnileraangata atasuinnarmillu pisunik aallartitsigaangata, naggataatigut pinngitsaaliilluni qitornamik arsaarinninnermik inerneqartumik.
Mariemik taavarput suliamut tunngatillugu kinaassutsimi ilisarineqarnissaa kissaatiginngimmagu, naak Kalaallit Nunaanni amerlasuut oqaluttuaa ilisimagaluaraat.
Tupakuluusimik napparsimasoq
Marie Kalaallit Nunaanni illoqarfeeqqamit Københavnimut nuuppoq ilinniariartorluni. Gymnasiami angusarissaarsimasuuvoq aamma aatakkumini toqqissisimasumik peroriartortuulluni. Aammattaaq erninnguani ilagaa. Danmarkimi taamaallaat quersortualernini unamminartorsiutigaa. Nakorsiartaraluarluni assigiinngitsunillu nappaateqarnerarneqartarluni quersortarnini ajoqutigaa. Kiisami nakorsat arlaata ilimagilermagu tamanna tupakuluusiusinnaasoq nappaataa ajornerulingaatsiarsimammat ernera aammattaaq napparsimalersimavoq. Marluullutik katsorsartipput – napparsimavinnili assigiinngitsuni marlunni. Tupakuluusimut katsorsartinneq sakkortullunilu sivisuvoq. Ullut tamaasa Marie nakorsaatinik amerlasoorpassuarnik iisisarpoq. Taamatuttaaq ernera, Mariemulli ajornakusoorpoq ernermi iisitittarnissaa. Tamannalu ullut tamaasa ajornartorsiutaavoq Mariep nammineq pitsaanerulerniarluni nukittorsarniarnera ilutigitillugu. Ullut ilaanni napparsimavimmiilluni tamanna ingasagilluinnalerpaa. Mariep pakatsisimalluinnaqqalluni peqqissaasut aggeqquai ikioqqulluni. Taamatut pakatsisimaqqanermini nilliaffigai.
– Tupakuluuseqarnera ilaatigut pissutigalugu kisimiitinneqarpunga. Ilaatigut qasulluinnarpunga aarleqqutigalugulu ernerma qanoq pineqarnissaa eqqarsaatigalugu. Nakorsaatitunngippat inuunera aarleqqutigaara. Tamanna ilutigalugu erloqissutigisarpara qiagaangat nakorsaatitorumananilu equsaaleraangat. Ullut tamaasa nakuusernerusarpoq, tamannalu uannut artornartorujussuusarpoq. Misiginngilanga ikiorneqarlunga.
– Napparsimavimmi oqaluttuuppaannga immaqa kommunimit tapiiffigineqarsinnaasunga suliassanut soorlu errorsinermut aamma eqqiaasarnermut. Attaveqarfigaara, ataatsimiinnissamullu aggersarpaannga. Kisianni ikiorneqassaguma taava nalunaaruteqartariaqartassapput, taamatut oqarput. Tamanna paasinngilara. Sooq napparsimanerup nalaani ikiortinnissamut taamatut nalunaaruteqartassappat? Kimigiiserfigaanngali oqarlutik tamanna aqqutissatuaasoq ikiorneqassaguma. Nalunaarutaat e-boksimi takugakku annilaarpunga. Ilaatigut allassimavoq uanga napparsimavimmi ernera nilliaffigisimagiga. Aammattaaq allassimavoq ilaqutariit katsorsartinneranni peqataasalissasunga, tamatumani anaanatut pitsaanerulernissannik ikiorneqassagama. Ullut tamaasa napparsimavinni assigiinngitsuni marlunni tupakuluusimut katsorsartikkiartortarnerup saniatigut aammattaaq sapaatip-akunnerannut arlaleriarlunga ilaqutariit katsorsartinnerannut peqataasalissaanga.
tupakuluuserlunga, suliassanullu nalinginnaasunut ikiorneqarnissara noqqaassutigaara. Maanna issiapput uangalu angajoqqaatut piginnaaninnik nalilersorlunga, Marie oqaluttuarpoq.
Allaaserisaq tamaat uani Sermitsiami pisiarisinnaasanni atuaruk: