Naalagaaffik Nunarpullu peqqissutsimut aningaasartuutit saqitsaassutigaat

Nuummi inissiisarfimmi nutaami inissinneqartussat napparsimalerpata, passunneqarnerat kiap akilissavaa? Apeqqut taanna Naalagaaffiup aamma Naalakkersuisut isumaqatigiissutiginngilluinnarpaat.

Peqqinnissaqarfimmut akisussaaffik 1992-imi tiguneqarnera pissutigalugu. Kalaallit Nunaat akiliisariaqartoq, inatsisinut atuutsitsinermut ministeri Søren Pape Poulsen, Aaja Chemnitz Larsenimut akissuteqarnermini ilisimatitsivoq.

Pinerluttunut Isumaginnittoqarfik aamma Inissiisarfik danskit akisussaaffianniinnerarlugu Naalakkersuisut tunngavilersuuteqarput, nakorsaatit aamma inissinneqarsimasut tarnip pissusaanik ilisimasalinnit katsorsarneqarnerat danskit naalagaaffiannik akilerneqartarnissaannik tamanna isumaqarpoq.

- Ajornartorsiutip ataatsimut aaqqiissuteqarfiginissaa soorunami pingaaruteqarpoq, taamaalilluni inissinneqartut Kalaallit Nunaannut nuukkusuttut, peqqissutsimut tunngasunik passunneqarnissartik pillugu kia akisussaaneranik nalorninertik pillugu Herstedvester Fængselimiiginnarniarlutik aalajangertoqannginniassammat, inatsisinut atuutsitsinermut ministeri akissummini allappoq.

Aaqqiissummik nassaartoqassaaq

Inissiisarfiup ukiumi nutaami ammannginnerani akerleriissuteqarnermi aaqqiissummik nassaartoqareersimassasoq, Søren Pape Poulsenip naatsorsuutigaa.

Taanna danskit aningaasaleeqataasinnaanissaannut tunngatillugu matumik ammatitsivoq:

- Aaqqiissuteqarniarluta Naalakkersuisut oqaloqatiginerat nangissavarput - aamma naak pisussaaffigisorinngisatsinnik aningaasartuuteqarnissatsinnik kinguneqassagaluarpat, Søren Pape Poulsen allappoq.

Powered by Labrador CMS