Naalagaaffik kilisaatip uuliakoorneranik saliinermut akiliuteqassasoq
Danmarkip naalagaaffiata kilisaat Polar Aassik ikuallariarluni kivimmat mingutsitsinermik saliineq akilissvaaa.
Marts 2017-imi avatangiisinut naalakkersuisuusup Danmarkimilu illersornissamut ministeriusup tunngaviusumik isumaqatigiissutaanni allassimavoq, ”Namminersorlutik Oqartussat Kalaallit Nunaata imartaani uuliamik kemikalianillu annertuumik mingutsitsisoqarnerani Danmarkip naalagaaffia qinnuigisinnaagaat mingutsitsinermik saleeqqullugu, naalagaaffiullu pisussaaffigigaa Namminersorlutik Oqartussat piumasaqaataannik malinninnissaq aamma mingutsitsinermik saliinermi aningaasartuutinik akiuliuteqarnissaq”, Avatangiisinut Naalakkersuisoqarfimmi pisortaq Mette Skarregaard Pedersen ilisimatitsivoq.
Naalakkersuisoqarfimmi pisortap ilisimatitsissutigaa, naalakkersuisoqarfimmit Issittumi Sakkutooqarfik martsip 15-iani piumaffigineqarsimasoq mingutsitsinermut akiuiniaqqullugu, Issittumilu Sakkutooqarfik tunngaviusutumik isumaqatigiissut naapertorlugu tamatumunnga akuersaarsimasoq.
- Issittumi Sakkutooqarfiup (Danmarkip naalagaaffiata) taamaammat imaani suliassamut akisussaaffik tigusimavaa, Mette Skarregaard Pedersen imaanni maannakkut saliinissaq pillugu oqaaseqarsinnaanngitsoq ilisimatitsivoq.
Killiffik
Issittumi Sakkutooqarfiup marlunngormat ullaakkut ilisimatitsissutigaa, sumiiffimmi solaari suli siaruaakkiartortoq. Sikumerngit pissutigalugit solaarip siammatsaaliorlugulu qallorniarnera ajornarpoq.
Umiarsuit alapernaarsuutit Knud Rasmussen aamma Ejnar Mikkelsen suli sumiiffimmiipput akuttunngitsumillu misissugassanik tigusisarlutik, taamaalilluni uulia sunaanersoq qanorlu annertutiginersoq erseqqissummik paasineqarniassammat.
Ippassaq kilisaatip kiviffiata ungasilaartuani uulia alla annikitsoq puttallarpoq.
- Maannamut takuneqarsimasunit uulia kinernerusutut isikkoqarpoq. Uuliaterinermi atorneqartartuunngikkuni hydraulikoliaannguatsiarpoq, 5 liiterili sinnerlugu annertussuseqanngilaq. Misissugassamik tigusiffigineqarsimavoq, tassani paasiniarlugu uulia Polar Aassikkimeersuunersoq, Issittumi Sakkutooqarfik ilisimatitsivoq.
Sumiiffimmiiginnassasut
Issittumi Sakkutooqarfiup umiasuai nakkutilliillutik killiffimmillu nalunaaruteqartarniarlutik, taakkununnga ilanngullugu isumalluutissanik allanik amerlanerusunilluunniit atuutsitsisoqassanersoq nalilersuiuarniarlutik sumiiffimmiiginnassapput. Aamma innuttaasut imaani uuliamik takusaqarsimassappata kiisalu imaani uumasut timmissalluunniit uuliamik timaaniittoqarneranik takusaqarsimassappata tusarfigerusunneqarput.