Naalagaaffiit Peqatigiit nunarsuarmi anguniagai sammineqartut
Sisimiuni Minngortuunnguup Atuarfiani atuartut sapaatit akunnerni marlunni immikkut ittumik sammisaqarput, Naalagaaffiit Peqatigiit nunarsuarmi anguniagai 17-iusut immikkut atuartitsissutigineqarlutik.
Kalaallit Nunaanni meeqqat inuusuttullu nunarsuup paarilluarnissaata pingaaruteqassusianik ilisimasaqarneruleriartorput.
Nuummi inuusuttut sila pillugu ingerlaaqatigeeqqammerput.
Atuarfik Hans Lyngemi atuartut plastikki pillugu immikkut suliaqaqqammerput.
Sisimiunilu Minngortuunnguup Atuarfiani atuartut maanna aamma suliaqartunut ilanngupput.
Qeqqata Kommunia tusagassiutinut taama nalunaaruteqarpoq.
Naalagaaffiit Peqatigiit nunarsuarmi anguniagassai immikkut ittumik atuartitsissutigineqarput, atuartummi sapaatit akunnerni marlunni immikkut ittumik sammisaqartinneqaramik. Naalagaaffiit Peqatigiit anguniagaasa ulluinnarni atuutsilernissaannut atuartut pilersaarusiorsimapput.
Anguniakkat ataasiakkaarlugit
Naalagaaffiit Peqatigiit anguniagai 17-it pillugit atuaqatigiit arlallit suliaqarsimapput. NP-p anguniagai 17-iusut nunarsuup piujuaannartitsilluni ineriartornissaanut anguniagaqartuupput.
Minngortuunnguup Atuarfiaani 3.b-t anguniagaq nr. 12 sammivaat, tassa akisussaassuseqartumik pilersitsineq atuinerlu.
3.b-it atisanik atoqqiisinnaaneq suliaraat, atisallu atorunnaarnikkut isumassarsiorlutik nutaamik atisaliareqqillugit. Atisat allanngortillugit mersoqqinneqartut takutinneqarput. Suliaqarnerminni atuartut paasisimavaat atisaliornermi pisuussutit, soorlu imeq CO2-lu annertungaatsiartoq atorneqartartoq, atisanillu atoqqiineq avatangiisinut pitsaanerusoq.
9.b-t nerisassanik eqqaannginnissaq sammivaat. Taakku suliffeqarfiit nerisassanik nioqqutissiortut tuniniaasullu pulaarsimavaat.
Qeqqata Kommuniata borgmesteria, Malik Berthelsen (S), suliat saqqummersinneqarmata qaaqqusaasimavoq.
- 3.b aamma 9.b-it saqqummiussaat assut ajunngillat
aammalu ulluinnarni inuunitsinnut pingaaruteqarnerinik takutitsillutik, soorlu atisanik atoqqiineq pisariaqanngitsumillu nerisassanik maangaannartitsisarneq. Atuartut eqqaasippaatigut pissusitsinnik allannguinitsigut pinngortitamik paarinninnerulersinnaanissatsinnik, oqarpoq.
Imeq
7.b-it nunarsuarmi anguniagaq nr. 6, tassalu imeq minguitsoq, pillugu suliaqarnerminni kommunip Kangerlussuup tungaanut aqqusinniornissaa pillugu siunnersuuteqarput.
- Aqqusinissamut siunnersuutip suliarinera assut pissanganarsimavoq, aammalu ATV-it biilillu sukkut ingerlasarnissaannik ilisimasaqaleqqillunga. Pingaartumik imeqarfimmi imermut milluaasup takunera, qanorlu katitigaanera takullugu nuannerpoq, Julius 7.b-meersoq oqarpoq.
- Pingaartumik maluginiarpara 7.b-it aaqqiissutissatut siunnersuutaat aqqusinermullu aaqqissutaasinnaasutut takorluugaat, taamatullu erngup minguitsuunissaata isumannaajaarnissaa. Aammattaaq tupaallaatigalugu nuannaarutigilluinnarpara biilit ATV-illu aqqutaani aqqutip sivinganeri eqqarsaatigisimammatigit, Malik Berthelsen oqarpoq.