Naalagaaffiit Peqatigiit aarlerisaattut ajornerpaattut Kalaallit Nunaanni sermeq aakkiartorpoq
Kalaallit Nunaanni Issittumilu Kujallermi sermeq sukkasuumik aakkiartorpoq. Ima sukkatigaaq, Naalagaaffiit Peqatigiinni silap pissusaa pillugu immikkut ilisimasallit ernumagisaattut ajornerpaatut aakkiartortoq.
Kalaallit Nunaanni Issittumilu Kujallermi sermip aakkiartornera sukkasoorujussuuvoq. Nutaarsiassaqartitsivik DR.dk taama allappoq. DR.dk-p DMI-p aamma University of Leedsip ilisimatusarnera, Nature Climate Changemi saqqummersimasoq malinnaavigisimavaa.
- Ukioq 2000-it missaani aakkiartorneq sukkanerulersimasoq takusinnaavarput. Sulilu sukkaneruleriartorpoq.
Silap pissusianik ilisimatooq Ruth Mottram DR.dk-mut oqarpoq nangillunilu:
- Sermip qanoq sukkatigisumik aakkiartornera, immallu qanoq sukkatigisumik qaffakkiartornera pillugu paasinninnitta annikinnera ajornartorsiuterujussuuvoq. Piareersarsinnaasariaqarpugummi.
Issittumi avannarlermi silap allanngoriartupiloornera
Kalaallit Nunaanni Issittumilu Kujallermi sermip aakkiartornerata kingunerisaanik 1990-kkunniit maannamut immat 1,8 centimeterinik qaffassimapput.
Tamannalu sukkatsikkaluttuinnassaaq. Misissuinerup takutippaa Kalaallit Nunaanni sermersuup aakkiartornera 1990-mut sanilliullugu maanna arfineq-marloriaammik sukkanerusumik aakkiartortoq, DR.dk allappoq.
Kalaallit Nunaata silaa Issittup Kujallermit sunnerneqarnerusimavoq.
- Kalaallit Nunaat pitsaanerusumik silaannaqarpoq. Sivisuumilli naqitsinertuffeqarsinnaasarpoq, sermeq aasakkut sukkanerusumik aakkiartulersarpoq, Ruth Mottram oqarpoq.
Taama pisoqarpoq aasakkut 2019-imi. Kalaallit Nunaanni sumiiffinni arlalinni kiarujussuarpoq.