Naalagaaffeqatigiinnut ministerimut aap, inatsisinut tunngaviusunut amerlanerusunut naamik

Folketingimi pissaaneqarniunnermi saamerliit talerperliillu suli naligiittorujussuupput. Taamaasilluni aamma suli pissanganarpoq savalimmiormiut kalaallillu ilaasortaatitaat aalajangiisunngussanersut.

Partiit marluk tamanna atorluarniarpaat. Kalaallit Nunaanni IA-p, Savalimmiunilu Republikanerne, pingaartitamikkut saamerlertut politikkillit, siumut nalunaareernianngillat saamerliit talerperliilluunniit tapersussanerlugit. Høgni Hoydal, Republikanerit siulittaasuat, oqarpoq piumasarissagitsik Savalimmiut namminerisamik tunngaviusunik inatsiseqalernissaat, qallunaat akulerutsinnagit.

Piumasaqaat tamanna Dansk Folkeparti-p tapersernianngilaa, talerperliit Republikanerit taasinerat atorfissaqartissagaluarpassuk.

– Amerlanerusunik tunngaviusunik inatsiseqalernissaq matoqqalluinnarpoq. Savalimmiut namminersulivissagaluarunik nammineq tunngaviusunik inatsisiliorsinnaavoq. Lars Løkke Rasmussen Helle Thorning-Schmidtilu oqaloqatigisimavakka, marluullutillu piumasaqaat tamanna itigartinniarpaat, Søren Espersen oqarpoq.

Naalagaaffeqatigiinnut ministereqalernissat taperserpaa

Akerlianik Søren Espersenip naalagaaffeqatigiinnut Issuttumullu ministereqalernissaanik IA-p piumasaqaataa ilalernartinneruvaa.

– Isumassarsiatsialaavoq, tamannalu tikissagaluarutsigu tapersersussavarput. Naalagaaffeqatigiinneq ullumikkut ministeriunerup oqartussaaffiata ataaniippoq, ministeriunerullu suliassaq paarinngippagu nuunneqarnissaa isumassarsiatsialaavoq, Søren Espersen oqarpoq.

Finn Thranum, Venstre-t Savalimmiunut oqaaseqartartuat, aamma isumaqarpoq IA-p siulittaasuata Sara Olsvigip isummat saqqummiussai pitsaasortaqartut.

– Soorunami tamanna ministeriuninngortussap isummerfigisussaavaa, siunnersuulli pitsaasortaqartoq takusinnaavara. Silatusaarnerusorinngilarali naalagaaffeqatigiinnut Issittumullu immikkut ministereqarfeqarnissaq. Ministereqarfimmut allanut inissinnera silatusaarnerunerpaassaaq, Finn Thranum oqarpoq.

Finn Thranum savalimmiut tunngaviusumik inatsiseqalernissaannik Høgni Hoydalip piumasaqaataa isummerfigerusuppallaanngilaa, Republikanerit pissaanermik tigusinissamut aalajangiisuussagaluarpata.

– Savalimmiut nammineq aalajangissavvaa namminersulivikkusunnerluni. Naluara Høgni Hoydal qanoq sulisarnersoq, Sjúdur Skaale-lli aamma Edmund Joensenip malugisinnaalluartarpaat sunik piumasaqarsinnaanerlutik. Piumasaqartarput piviusorsiorpalaartarlutillu, ingasaassiniarnaveersaartarlutik, Finn Thranum oqarpoq.

Saamerliit mianersortumik nalunaarput

Piumasaqaatit Savalimmiuneersut Kalaallillu Nunaanneersut pillugit socialdemokraatit oqaaseqarnissaminnut mianersornerupput.

– Savalimmiunit Kalaallillu Nunaannit folketingimut ilaasortat suleqatigilluarlugillu oqaloqatigilluartarsimavagut. Isumaqarpunga qinersinerup kingorna aamma taamaassasoq. Maannakkorpiaq qinersineq qineqqusaarnermilu sapaatip akunnera kingulleq sammivarput, Socialdemokratit sinnerlugit Dan Jørgensen oqarpoq.

Aamma Socialistisk Folkeparti isumaqatigiinniartoqarsinnaanera pillugu oqaaseqarnissaminut mianersorpoq. Ammarsimatippaali suut tamarmik isumaqatigiinniutigineqarsinnaasut.

- Isumaqarpunga Savalimmiut Kalaallillu Nunaat ministeriuninngortussamut piumasaqaateqassasut. Tamanna ajunngiinnarpoq. Taava ministeriuninngortussap nammineq nalilissavaa kissaatigineqartut qanoq annertutigisumik akuerisinnaanerlugit akueriumanerlutillu, savalimmiunut oqaaseqartartoq Jonas Dahl oqarpoq.

Tassa imaappa naalagaaffeqatigiinnut ministereqalernissamik Savalimmiullu tunngaviusunik inatsiseqalernissaannik piumasaqaatit SF-p taperserai, ilaasortallu atlantikup avannaaneersut tapersersortassagai?

– Isumaqarpunga ilaasortat atlantikup avannaaneersut kissaataat tapersersorsinnaagivut, Jonas Dahl oqarpoq.

Lars Løkke Rasmussen arlaleriarluta saaffiginnittaraluarluta oqaaseqartissinnaasimanngilarput.