Naalagaaffeqatigiinnermi aporfiusartut peerneqarniartut
Nunanut allanut ministeeriaqarfimmi Nunanut Avannarlernut Allattoqarfiup Kalaallit Nunaatta danmarkillu akornanni aporfiusartut arfineq-marluk sussusersisimavai, taakkulu peerniarlugit sulissutigineqalersimalluni.
Danmarkimi Kalaallillu Nunaanni oqartussat susassaqarfiit arfineq-marluk qitiutillugit suliaqarput, susassaqarfinni pineqartuni aporfiusartut peerniarlugit suliaqartoqartoqarluni.
Pineqartut allattorsimaffiat 2020-mi juunip qaammataaneersut taarserneqassapput, allattorsimaffimmilu nutaami marlunnik nutaanik ilanngussisoqarsimalluni, nalunaarasuartaammik atuineq telefonilu.
Ilanngutassiaq atuaruk: Ministeri: Mobilikkut sianerneq akisuallaarunnaassaaq
Susassaqarfimmi ataatsimi suliaqarneq ingerlalluarmat inatsisissatut siunnersuusiortoqarsimavoq.
Tassani pineqarput pissutsit immikkut illuinnartut, tassa napparsimanermi pisortat ikiorsiissuteqartarnerannut tunngassuteqartut aamma suliffeqanngikkallarnermi ikiorsiissutit suliffissarsiornermi ikiorsiissutinik taarserneqartussat, tassani napparsimanermi sapaatip akunneri 13-it ingerlareeraangata ikiorsiissutit unitsinneqartarunnaarlutik ukiup affaa angullugu ikiorsiissuteqartalernissaq, Nunanut Avannarlernut allattoqarfiup allattorsimaffiutaani tamanna atuarneqarsinnaavoq.
Kalaallit Nunaannut atatillugu aporfiusartut:
Napparsimanermi ullormusiat
Arnat aappariit anaanaasinnaanerisa inatsisitigut pisinnaatitaaffeqannginnerat
Nakorsaatinik ilanngussisarneq
Napparsimmavimmi suliaritittuarnissamut akiliuteqartarneq
Kalaallit Nunaannut uumasuummik eqqussisinnaaneq/annissisinnaaneq
Nalunaarasuartaammik atuineq
Telefoni
- Naalagaaffeqatigiinni aporfiusartut tassaasinnaapput, nunani ataasiakkaani assigiinngitsutigut inatsisitigut atugassarititaasut siunertamut naapertuutitsiunnaarlutillu aporfiliisartut, assersuutigalugu naalagaaffeqatigiit iluini nuunnermi. Aporfiusartut ilaanni inatsisitigut atugassarititaasut allangortinneqarnissaat pisariaqarsinnaasarpoq, susassaqarfinnili allani inatsisitigut atugassarititaasut assigiinnginnerat tunngavissaqarluarsinnaavoq, allakkiami nassuiaatigineqarpoq.
Susassaqarfiit arfineq-marluk pillugit allakkiaq aamma taakku killiffiat atuakkit