Naalagaaffeqatigiinneq pillugu piviusulersaarummik filmiliornissat taperneqarsinnaapput
Naalagaaffeqatigiinneq pillugu ilisimasaqarnerulernissaq anguniarlugu danskit aningaasanut inatsisaanni 25 milliuunit koruuninik immikkoortitsisoqarpoq.
Piviusulersaarutinut filmilianut, paasisassarsiorluni angalanernut højskoleriartornernullu tapiisoqarpoq. Suliniutit tamakkuupput, danskit naalakkersuisuisa taperumasaat, naalagaaffeqatigiinnerup iluani ilisimasaqarnerulernissaq anguniarlugu.
- Isuma unaavoq, nunat assigiinngitsut pingasut, tassa Danmarkimi, Kalaallit Nunaanni, Savalimmiunilu inuusuttut naapeqatigiinnerulissasut, misigisaqaqatigiinnerulissasut, neriuutigaaralu aamma ikinngutitaartornerulissasut, pigiliutiinnakkanik isumat atorunnaarneqassasut, paaseqatigiinnerlu ataqqeqatigiinnerlu aamma inerisarneqassasut, Folketingimi ippassaq apeqqarissaartoqarnerani Lars Løkke Rasmussen (V) oqarpoq.
Danskit naalakkersuisuisa ukiuni sisamani tulliuttuni katillguit 25 milliuunit koruunit immikkoortippaat, naalagaaffiup iluani ilisimasaqarnerulernissamut atugassanngorlugit. Suliniut Lars Løkke Rasmussenimit (V), Kim Kielsenimit (S) savalimmiullu lagmandianit Aksel V Johannesenimit juunimi naalagaaffeqatigiinnerup iluani naapeqatigiinnermi isumaqatigiissutigineqarpoq.
Aningaasat suliniutinut ukununnga atorneqassapput:
- Piviusulersaarutitut filmilianut assigisaanullu aningaasaliilluni tapiinerit
- Inuusuttut paasisassarsiorlutik angalanerinut tapiinerit
- Inuusuttut højskolernissaannut tapiinerit
- Ilinniagaqarnermut tunngasunut aningaasat agguaassassat
- Ingerlaqqilluni ilinniakkamik inaarutaasumik suliaqarnermi unammisitsinerit
- Suliap aallartinnissaanut qilanaarpunga, qujarusuppungalu taama suliaqarnermi Folketingimi partiit ilaasortaatitaasa tapersiinerannut, aammali qujarusullunga savalimmiut lagmandiannut kalaallillu naalakkersuisuisa siulittaasuannut kiisalu atlantikup avannarpasissuani politikkikkut suliaqaqataasunut, Lars Løkke Rasmussen oqaluttarfimmiit oqaaseqarpoq.
Suliniutip mikisualuttortai pillugit maanna suliaqartoqalissaaq. Aningaasanik taperneqarnissamut Kultooreqarnermut, Ilinniartitaanermut Ilisimatusarnermullu ministeriaqarfimmut qinnuteqartoqarsinnaalerpat nalunaarutigineqarumaarpoq.