Naalagaaffeqatigiinneq meeqqat atuarfianni atuartitsissutigineqartalissaaq
Danskit meeqqat atuarfii pillugit isumaqatigiissut nutaaq malillugu, oqaluttuarisaanermi atuartitsinermi Naalagaaffeqatigiinneq ilanngunneqartuaannalissaaq.
Danmarkimi meeqqat atuarfianni atuartut Naalagaaffeqatigiinneq pillugu atuartinneqartalissapput.
Meeqqat atuarfii pillugit aaqqissuussinermi Folketingimi amerlanerussuteqartut isumaqatigiissutaanni tamanna ilanngunneqarpoq.
- Naalagaaffeqatigiinneq meeqqat atuarfiini atuartitsissutissatut pinngitsoorani ilaatinneqartassaaq. Naalagaaffeqatigiinneq oqaluttuarisaanermi atuartitsinermi ilaatinneqassaaq. Naalagaaffeqatigiinnerup oqaluttuassartaani pisimasut sorliit ilaatinneqassanersut pillugit immikkut ilisimasalinnik inuttalikkamik eqimattamik nalilersuisussamik pilersitsisoqassaaq, isumaqatigiissutigineqartumi allassimavoq.
Aningaasanut inatsisip isumaqatiginninniutigineqarnerata nalaani naalakkersuisut oqariartuuteqarput meeqqat atuarfiata aaqqissuuteqqinneqarnerani siunnersuut amerlanerussuteqartunit tapersersorneqarnissaa anguniassallugu, tamannalu iluatsippoq.
Naalagaaffeqatigiinnerup atuartitsissutigineqartalernissaanut innuttaasut siunnersuuteqartarfiatigut suliaqaqatigiit siunnersuuteqareersullu inatsisissatut siunnersuuteqartoqarpoq. Siunnersuut maannamut 2.300-nit atsiorneqareersimavoq, 50.000-iniillu atsiorneqarpat Folketingimi saqqummiunneqarsinnaalissalluni.
Naalagaaffeqatigiinnerli atuartitsissutigineqartalissaaq – tassa oqaluttuarisaanermi.