meeqqat atuarfiat

Naajap pisortat atuarfiutaat taamaatiinnarpaa

Inatsisartunut ilaasortap IA-mi nuimasup, meeqqani Nuuk Internationale Friskolemi atualissasut aalajangerpoq

- Avataaniit isigalugu atuarfeqarneq tamarmi qasusoorsimasutut isikkoqarpoq, Naaja Nathanielsen oqarpoq

Ilinniartitsisut takkutinngitsoortarnerat annertooq, ilinniarnermut eqquisoq.

Atuartunut atuakkanik nuannarisaqartunut unammilligassat amigartut, klassini eqqissiviilliortitsilertartut.

Angajoqqaat ilanngunneqarnissaannik tusaaneqarnissaannillu soqutiginninneq amigartoq.

Aammalu ulluinnarni anitsiarfinni qinngasaarineq annersaanerlu.

Tunniutiinnartoq
IA-mi politikeri nuimasoq, Naaja Nathanielsen, pisortat atuarfiutaannut tunngatillugu tunniutiinnarpoq, tassani atuarfiup siulersuisuiniittaraluarluni aamma ulluinnarni angajoqqaatut sunniuteqaqataasuunikuugaluarpoq.

Meeqqani Nuuk Internationale Friskolemut nuutsinniarlugit taanna aalajangerpoq. Pania aallarteqqammerpoq, erneralu inissaqaleriarpat malinnaassaaq.

Pisariaqartoq
Aalajangerneq ajornarluinnartuusoq Naaja Nathanielsenip nassuerutigaa, kisianni pisariaqarluinnartuunerarlugu.

- Ilorpianni misigisimavunga meeqqat allat ilinniartitsisullu sumiginnarlugit meeqqama ataatsimoornermit anisinnerisigut. Misigisimavunga inoqatinnik soqutigittaatsumik iliorsimallunga. Killissarali tikissimavara. Isummersoriaasera naapertorlugu illersorsinnaajunnaarpara takusinnaallugu meeqqakka atugarliortinneqartut, taanna AG-imi uani sapaatip akunnerani saqqummertumi atuartartut allappoq.

Stressi
- Avataaniit isigalugu atuarfeqarneq tamarmi qasusoorsimasutut isikkoqarpoq. Allaanngilaq ilinniartitsisut aqutsisuisalu amerlanersaat qatserinermik suliaqartartut, suliassanullu nuannersunut pissarsinartunullu piffissaqaratillu nukissaqaratik, meeqqat atuarfiat pillugu taanna oqaaseqarpoq.

Naaja Nathanielsenip ilanngussaa tamaat aamma aalajangerneranut qisuariaatit AG normu 9-mi atuaruk. Aviisi pisiniarfimmi imaluunniit uani ataani pisiarisinnaavat.

Meeqqat atuarfiisa pitsaassusaat pillugu oqallinnermut ilanngunnissannut aamma tikilluaqqusaavutit. Allaaserisap ataani oqaaseqartarfik atoruk. Aammalu tallimanngorpat marsip sisamaani nalunaaqutaq 10.00 - 12.00, Naaja Nathanielsen Sermitsiaq.AG-mi allaqatiginissaanut tikilluaqqusaavutit.

Powered by Labrador CMS