Naajap juullimut kissaatai: Sulinermi atukkat pitsaanerusut pineqaatissiinerillu sivisunerusut
Inatsisit atuutsinneqarnerannut naalakkersuisoq Naaja Nathanielsen danskit justitsministeriannut, Nick Hækkerupimut arlalinnik kissaateqarpoq. Ilaatigut sulinermi atukkat pitsaanerusut aamma ilungersunartumik pinerluuteqarnermi pineqaatissiinerit sakkortunerusut.
Ulloq 2. decembari Naalakkersuisup Naaja H. Nathanielsenip qallunaat justitsministeriat Nick Hækkerup ataatsimeeqatigaa. Inatsisit atuutsinneqarnerannut suliassaqarfimmi pitsaassutsip qaffanneqarnissaa pillugu naalagaaffimmi oqartussat suleqatigiinnerannut atatillugu ataatsimiinneq ingerlanneqarpoq.
- Inatsisit atuutsinneqarnerannut suliassaqarfik qallunaat akisussaaffeqarfigaat, kisianni ineriartornerup kalaallinit oqaasertalersorneqarnissaa saqqummiunneqartarnissaalu Naalakkersuisut annertuumik pingaartippaat. Taamaammat qallunaat naalakkersuisuinik oqaloqatiginnittarneq nuannaarutigaarput. Inatsisit atuutsinneqarnerannut suliassaqarfiup ineriartortinneqarnissaata pisariaqartitsineqarnera, minnerpaamillu Danmarkimi pitsaassutsimut naligiissinneqarnissaa pillugit erseqqissaasoqartuarnissaa pisariaqarpoq, Naaja Nathanielsen ataatsimiinnerup kingorna taama oqaaseqarpoq.
Pinerluttunik isumaginnittut pillugit isumaqatiginninniarnerni ingerlasuni Kalaallit Nunaata iluaqutissinneqarnissaa pillugu, ingammik inissiisarfinni suliffissaqartitsiniarnermut suliniutit aamma sulisunut sulinermi atugassarititaasut eqqarsaatigalugit, Naaja H. Nathanielsenip kissaateqarnini ataatsimiinnermi saqqummiuppaa.
Taasuma saniatigut pinerluttulerinermi inatsimmi pineqaatissiisarnermi killissarititaasup ukiunit 10-niit ukiunut 16-inut qaffanneqarnissaata kissaatigineqarnera kalaallit inatsisit atuutsinneqarnerannut naalakkersuisuata aalajangiusimavaa, taamaalilluni pinerluuteqarnerni ilungersunarnerpaani sivisunerusumik pineqaatissiisinnaaneq periarfissanngorniassammat.
Politeeqarfinnik atorunnaarsitsisoqassanngilaq
Siornatigut Kangaatsiaq politeeqarfeqassanersoq annertuumik oqallisigineqarnikuuvoq. Borgmesterip Ane Hansenip peqartariaqarsora – Justitsministerillu peqartariaqanngitsoq isumaqarpoq, taamatullu suli isumaqartoq, Naaja Nathanielsen ilisimatitsivoq.
Illoqarfimmi pinerluuteqartarnerup killeqarnera pissutigalugu Kangaatsiami politeeqarfiliortoqannginnissaa pillugu aalajangiinini aalajangiusimallugu ataatsimiinnermi Justitsministerip Nick Hækkerupip aammattaaq nalunaarutigaa.
Tamanna tunngavigalugu eqqarsartaaseq taanna malillugu politeeqarfinnik pioreersunik matusisoqarnissaanik pilersaarusiortoqannginnera Naaja H. Nathanielsenip qulakkeerpaa.
Tulleriiaarinermut allattuiffik nutaaq Naalakkersuisut suliarileruttoraat, taannalu ukiumi nutaami tamanut saqqummiunneqarumaartoq aamma suliniutinik suliassaqarfinnillu ukkatarineqartussanik nutaanik, assersuutigalugu digitalikkut pinerluuteqartarnerit pillugit imaqarumaartoq, Naaja H. Nathanielsenip justitsministerimut naggataagut ilisimatitsissutigaa.