Naaja: Greenland Mineralsip nassuiaaneranut isumaqataanngilanga
Naalakkersuisut aatsitassanut nutaamik inatsisiliornerminni pigisanik pinngitsaaliilluni arsaarinnissuteqarput taarsiinertaqanngitsumik, Greenland Minerals taama isumaqarpoq. Naaja Nathanielsenip taama nassuiaateqarneq isumaqatiginngilaa, kisianni ingerlatseqatigiiffiup pisortartaavata Daniel Mamadoup qaammatip tulliani ataatsimeeqatiginissaanut akuersisimavoq.
Greenland Minerals 2011-mili Kuannersuarni aatsitassarsiornikkut suliniutiminnut 600 millionit koruuninit amerlanerusunik aningaasartuuteqartut – maannalu uranimut inatsisip nutaap kingunerisaanik taamaatinneqartoq – oqartussanut ilungersuussaqarnertik suli tunniutiinnarfiginngilaat. Pappiaqqat nalillit nalunaarsorneri naapertorlugit nalunaarummi 20. decembarimeersumi oqaatigineqarpoq, Aatsitassanut Naalakkersuisoqarfimmik ataatsimeeqateqarnerup kingorna, inatsisip pisinnaatitaaffinnik pigisanik arsaarinniffigigai paasineqartoq, aammattaaq pigisanik pinngitsaaliilluni taarsiinertaqanngitsumik arsaarinnittoqartoq.
Aviisi Sermitsiaq taama allappoq.
Aatsitassanut naalakkersuisoq, Naaja Nathanielsen, ataatsimeeqatigiumasimallugu aamma allappoq, taassuma ingerlatseqatigiiffiup februaarimi ataatsimeeqatiginissaa Sermitsiamut uppernarsarpaa.
Naalakkersuisoqarfiup ingerlatseqatigiiffiullu akornanni ataatsimeeqatigiinnerup kingorna imaqarluartumik imaqarniliamik Greenland Mineralsimut oqaaseqarfigineqartussanngorlugu nassiussisoqarsimasoq, Naaja Nathanielsen oqaluttuarpoq.
– Greenland Minerals imaqarniliamut aaqqiissutinik imaluunniit ilanngussassanik kingusinnerpaamik 29. december tunniussaqarnissamik qinnuigineqarpoq. Akerliliilluni nalunaarutinik tunniussaqanngilaq. Taamaattorli Greenland Minerals 20. decembarimili pappiaqqat nalillit nalunaarsorneri pillugit nalunaaruteqartoq paasivara, tassani ilaatigut allapput, inatsit pigisanik pinngitsaaliilluni taarsiinertaqanngitsumik arsaarinnissuteqarnermik paasineqassasoq. Nassuiaat taanna uanga isumaqatiginngilara, Naaja Nathanielsen oqarpoq.
Aviisimi Sermitsiami atuarnerusinnaavutit: