Naajaani innuttaasut ilungersunartumik inissisimalersut
Juulli sioqqutitsiarlugu iluliarsuup aserorneratigut mallit umiatsianik Naajaani aseruatiterimmata, eqqugaasut aningaasatigut annertuumik eqqugaasut, pisortanit tunuinnarneqartutut misigisimapput.
21. december iluliarsuup aserorneratigut malissuit Naajaanut anngummata, umiatsiat arfinillit atorsinnaajunnaarlutik aserorput. Tamatumalu kingunerisaanik aalisartut piniartullu eqqugaasut taakkulu ilaqutaat, puisinniarnermik aalisarnermillu inuussutissarsiuteqartut, maanna aningaasatigut imminnut naammaginartumik pilersorsinnaajunnaarput.
Aviisi Sermitsiaq taama allappoq.
Aatsaallu sikuppat qimussimik sikukkut qaleralinniarneq aallartissinnaalissaaq.
Ajutoornerup kinguninngua KNI A/S aamma Polaroil eqqugaasut nerisassanik juullisiutissanik, illumut kiassarnermut orsussamik qimminullu nerukkaatissanik tunniussaqaraluartoq, tunniunneqartut maanna tamarluinnangajammik nungussimalerput, eqqugaasullu amerlanerit nunaqarfimmi innuttaasunit maanna ikiorserneqartalerput.
Taamaattumik ajutoortoqarneratigut eqqugaasut maanna pisortanit tusaaniarneqanngitsutut sumiginnarneqartutullu migisigimalerput.Pisup kinguninnguatigut Avannaata Kommunia umiatsianik marlunnik attartorpoq, taakkulu eqqugaasut pisariaqartitaannik ikiorsiisussatut atorneqartussanngortinneqarput, aammali kommuni umiatsiamik isumannaatsumik upalugaarsimanissaq qulakkeerniarlugu umiatsiamik sillimasuutitassamik nutaamik pisivoq, taannalu maanna imertarnermut atorneqarpoq.
Avannaata Kommuniani borgmesteri Palle Jerimiassen, Siumut, naalakkersuisut siulittaasuannik Kim Kielsenimik, Siumut, ataatsimeeqateqarpoq. Naalakkersuisullu taarsiiffigineqarnissamut suliat kommunimiit isumagineqarnissaat innersuussutigaat. Taarsiiffigineqarnissamut qinnuteqaatit kommunimi inuussutissarsiornermi immikkoortortoqarfimmiit KNAPK-p ataani siunnersorteqarfimmut ingerlateqqinneqareerput.
Silamilli peqquteqartumik piniutinik umiatsinilluunniit annaasaqartoqarsimatillugu sillimmasiisarfiit taarsiissuteqartarnerat ajornakusoorsinnaasartoq, siusunnerusukkut siunnersorteqarfimmiit oqaatigineqarnikuuvoq.
Inuussutissarsiutigaluguli aalisartut piniartullu Aalisarnermut Piniarnermut Nunalerinermullu Pisortaqarfiup ataani, aallarteqqinnissamut aningaasaliissutinik, qinnuteqarsinnaatitaapput.
Najaaniit Avannaata Kommunianut saaffiginnissutit immikkut ittumik suliarineqanngitsut, Palle Jerimiassen erseqqissaavoq.
Ilungersunartumik inissinneq
Umiatsiaminnik piniutiminnillu annaasaqartut maanna piniarnissaminnut aalisarnissamilluuniit periarfissaqanngitsut, nunaqarfimmilu innuttaasunit ilaquttaminniilluunniit annerusumik minnerusumilluunniit ikiorneqarnissaminnut pisariaqartitsisut, Naajaani nunaqarfimmi aqutsisuni ilaasortaq, Abigail Petersen, oqarpoq. Ajutoornerup kingorna suliniutit pillugit nunaqarfimmi aqutsisut, Avannaata Kommunianiit attavigineqarsimanngitsut, taassuma ilanngullugu oqaatigaa.
– Avannaata Kommunia annertunerusumik iliuuseqanngilaq, aammali upalugaarsimanermut sillimatitassamik kommuni nutaamik umiatsiarsisimanersoq ilisimatinneqanngilagut. Naallu eqqugaasut ilai meerartaqaraluartut, kommune annerusumik ikiuunnianngitsoq malunnarpoq, Abigail Petersen oqarpoq.
Naajaat malissuarnit eqqorneqareernerata kingorna kingunerit allat pillugit aviisimi Sermitsiami atuarnerusinnaavutit. Aviisi uani pissarsiariuk: