Naaja SIK-mut: Ineqarneq akeqarpoq

INI A/S-ip inaataannik attartortut 2.887-ingajalluinnaat 2022-mi januaarup aallaqqaataani ineqarnermut akiliutit qaffanneqarpata eqqugaasussaapput. SIK-mi siulittaasoq aningaasarsiat qaffaataat akillu qaffaataat imminnut ataqatigiinnginnerarlugit Naalakkersuisunut avoqqaarinnissimavoq. Naaja Nathanielsenip erseqqissaassutigaa, Naalakkersuisut innuttaasut ullumimut naleqquttunik ineqartinneqarnissaat sulissutigigaat.

Inissiat oquttut, igalaavi ussiittut betonilu nungullartoq nunami maani innuttaasorpassuit ulluinnarni inuunerminni atugarisarpaat. Inissiarsuarni init aserfallatsaalineqarsimanngitsut inuiaqatigiinnut aningaasarpassuarnik naleqarput. Naalakkersuisut Namminersorlutik Oqartussat inissiaataanni 16-ini najugaqrtut ineqarnermut akiliutigisartagaat qaffanneqassasut septembarip naanerani aalajangerpaat. Ineqarnermut akilutit 2022-mi januaarip aallaqqaataani atuutilersumik qaffaatissaat qaammammut 50 koruuniniit qaammammut 560 koruunit angullugit annertussuseqassapput.

Attartortut atugaat qitiutinneqartoq

SIK-mi siulittaasup Jess G. Berthelsenip ineqarnermut akiliutit qaffaaffigineqarnissaannik aalajangersimaneq sakkortuumik isornartorsiorpaa.

Ineqarnermut Naalakkersuisup Naaja Nathanielsenip SIK-mi siulittaasumut akissuteqarluni oqaatigaa, ineqarnermut akiliutit ukiumut naleqqussarneqarneq ajorunik, inuiaqatigiinni nalinginnaasumik akitigut ineriartornernut najugaqarfinni isertitat malinnaasinnaajunnaassasut. Taamaalilluni ingerlatsineq, aserfallatsaaliinissarlu missingersuusiarineqarsinnaassanngillat. Taamaattoqarneratigut nukingernartumik aserfallatsaaliinissamut aningaasartuuteqartoqartariaqarpoq, inissiallu aserfallakkiartuinnassallutik.

- Akerleriittutut nipeqarsinnaagaluarpalluunniit, ineqarnermut akiliutinik naleqqussaasoqartillugu attartortut atugarissaarnissaat ukkatarineqarpoq. Namminersorlutik Oqartussat najugaqarfiini arfineq-marluusuni ineqarnermut akiliutit naleqqussarneqarnerisigut, najugaqarfinni ingerlatsinermut aserfallatsaaliinermullu akiliisinnaassuseqarnissaq qulakkeerneqassaaq, Ineqarnermut Naalakkersuisoq Naaja Nathanielseni oqarpoq.

Imaannaanngitsunik aalajangiinerit

Illoqarfinni arlaluni iluarsarasuagassat iluarsaanneqassappata, Namminersorlutik Oqartussat 4,9 millioner koruuninik nassaarniartariaqarput. Taamaammat Paamiuni ilaqutariinnut illuni attartortut qaammammut akiliutaat 50 koruuninik qaffassapput, nunamili tamarmi ilaqutariinnut ataatsinut illunik affarleriinnillu attartortut qaammammut akiliutaat 560 koruuninik qaffassallutik.

Tamanna Jess G. Berthelsenimit naammagineqanngilluinnarpoq, ilaasortaasummi isumaqatiginninniarnermi kingullermi nalunaaquttap akunneranut aningaasarsiaat 2,20 koruuninik qaffapput, januaarillu aallaqqaataaniit ineqarnermut akiliutiminni nalunaaquttap akunneranut 3,60 koruuninik akiliuteqarnerusalissallutik.

Naaja Nathanielsenip erseqqissaassutigaa, Namminersorlutik Oqartussat najugaqarfiisa aserfallakkaluttuinnarnissaat pinngitsoortikkumallugu, ineqarnermut akiliutit 2023-mi januaarip aallaqqaataa aallarnerfigalugu ukiut tamaasa akinut iluarsiilluni naleqqussarneqartalissasut pillugu Naalakkersuisut aalajangersimasut.

- Ineqarnermut akiliutit qaffanneri tusarliutissallugit nuannertuaannarneq ajorpoq, politikkikkulli aqutsisuugaanni aalajangigassat imaannaanngitsut aamma aalajangigassaasarput. Inissiaatigut ineqarfigisinnaaqqullugit inissiat aserfallatsaalineqartarnissaat, inissianillu ingerlatsineq qulakkiissallugit, Naalakkersuisut akisussaaffimmik tigusipput. Inissiat ukiut 25-t atoreersullu, aserfallatsaalineqartarsimannginnerat patsisaalluni ingutserneqassagunik akisuallaassaqaaq. Taamaattumik iliuuseqartoqartariaqarpoq, Naaja Nathanielsen (IA) naggasiivoq.

Powered by Labrador CMS