Skip to main content

Naaja Siimuumut: Kujataani timmisartoqarfiliornissaq arlaannaataluunniit unitsinnianngilaa

Simon Simonsen (S) Naalakkersuisunut ammasumik allagaqarsimavoq, isumaqarami Kujataani timmisartoqarfiliornissaq Namminersorlutik Oqartussanit kinguarsarneqartoq. - Aningaasaliineq siunissami imminut akilersinnaagaluarpalluunniit, allanut sunniuteqarsinnaavoq, Attaveqatigiinnermut Naalakkersuisoq akissuteqaammini ilaatigut allappoq.

Simon Simonsenip kujataani timmisartoqarfiliorniarnermut aaqqiissutissamik nassaartoqartinnagu sooq naalakkersuisunngorlaat misissueqqissaartoqarnissaanik aalajangersimanersut pillugu Naalakkersuisut nassuiaajartorlutik Kujataanukarnissai piumasarisimavaa. 

- Nuummi Ilulissanilu timmisartoqarfissat nutaat akisuallaartut paasineqarmat, immikkut aningaasaliissutissarsiorneq ingerlaannartumik aallartinneqarpoq. Misissueqqissaartoqaqqinnissaanik tusagaqanngilagut, aningaasassarsiorlunili ingerlaannartumik sulisoqalerpoq, Simon Simonsen ammasumik allagaqarnermini nassuiaavoq.

Attaveqatigiinnermut Naalakkersuisup Naaja Nathanielsen (IA) erseqqissaassutigaa, timmisartorsuarnut mittarfiusussat Kalaallit  Aiports International A/S-imit pigineqartut, Qaqortumili mittarfissaq Namminersorlutik Oqartussanit tamakkiisumik pigineqartoq.

- Imaanngilaq Qaqortumi mittarfiliortoqarnissaa tapersersorneqanngitsoq. Kisianni eqqortumik iliortoqassaaq, ima paasillugu, kingunissai pillugit massakkut ersarinnerusumik paasitinneqartariaqartugut, Naaja Nathanielsen Simon Simonsenimut akissuteqarluni allappoq.

Allanut sunniuteqarsinnaasoq

Kingullermik suliarumannittussarsiuussisoqarnerata takutippaa, timmisasrtoqarfissaq minnerpaamik en milliard koruuninik akeqassasoq. Tamanna siusinnerusukkut naalakkersuisuusimasut naatsorsuutigisimasaannit marloriaammik akisuneruvoq. Naalakkersuisut maanna timmisartoqarfiliortoqassasoq aalajangissappata, allanut sunniuteqartussaavoq.

- Aaqqiivigineqarnissaa Nunatta Karsianit akilerneqassaaq, taamaattumillu Qaqortumi mittarfiliornissami aningaasaliissutit allat suut sunnerneqarnersut allatut ajornartumik isiginiarneqartariaqarpoq. Kikkut tamat eqqarsaatigalugit tamanna pinngitsoorneqarsinnaanngilaq. Aningaasat siunertamut ataatsimut atugassanngortissimagaanni, siunertanut allanut ilutigisaanik atorneqarsinnaanngillat, Attaveqatigiinnermut Naalakkersuisoq akissuteqaammini allappoq.

Naalakkersuisullu erseqqissaassutigaa, politikkikkut partiinit allanit saaffiginnittoqarsimanngitsoq siunnersuutigalugulu Qaqortumi timmisartoqarfiliornissap unitsiinnarneqarnissaa pillugu. Aningaasaqarnikkununa pissutsit misissoqqissaarneqartariaqartut.

Namminersorlutik Oqartussat akiliuteqarnerussasut

Simon Simonsenip allakkamini oqaatigaa, Danmarkimi attaveqatigiinnerup ineriartortinneqarnissaanut danskit naalakkersuisui 160 milliarder koruuninik immikkoortitsisimasut usornartut. Tassunga atatillugu Naaja Nathanielsenip nassuiaatigaa, 2,1 milliarder koruunit Namminersorlutik Oqartussat immikkoortissimasaat, Danmarkimi politikkerit innuttaasumut ataatsimut immikkoortissimasaannit annertunerusut.

- Danmarkimi angallannermi attaveqatigiinnerup ineriartortinneqarnissaanut danskit naalakkersuisuisa 160 milliarder koruuniit taakku immikkoortissimasaat, Danmarkimi innuttaasumut ataatsimut agguaraanni innuttaasumut ataatsimut 28.000 koruunit missaat naligaat. Nuummi, Ilulissani Qaqortumilu mittarfinnik ineriartortitsinissaannarmut Namminersorlutik Oqartussat 2,1 milliarder koruunit immikkoortitaat, nunatsinni innuttaasumut ataatsimut agguaraanni innuttaasumut ataatsimut 37.500 koruunit missaat naligaat, Naaja Nathanielsen Simon Simonsenimut akissuteqarluni allappoq.

Namminersorlutik Oqartussat tamatuma saniatigut sineriammi tamarmi umiarsualiviit, mittarfiit allat qulimiguulinnullu mittarfiit isumagisussaavaat, taanna oqarpoq.

Naaja Kujataanukassasoq

Attaveqatigiinnermut Naalakkersuisup erseqqissaassutigaa, oqallinnerup piviusorsiorpalaartumik tunngaveqarnissaa pingaaruteqartoq. Naatsorsuutiginerarpaalu aggustip naaneran Kommuni Kujallermi kommunalbestyrelsimik ataatsimeeqateqarnissani.

- Naggasiullugu erseqqissaatigissavara, Kujataani angallanneq Naalakkersuisut pingaartimmassuk. Taamaattumik Kommune Kujallermi kommunalbestyrelsip ataatsimeeqatiginissaa pingaartittorujussuuara. Aggustip 23-anit 30-ata tungaanut pilersaarutaasumik Kujataaniinnissanni ataatsimiinneq ingerlanneqarsinnaassasoq naatsorsuutigaara, Naaja Nathanielsen naggasiivoq.

Kommunimi borgmesterip tikeraarnissamik pilersaaruteqarneq nuannaarutigaa.

- Maanna qilanaarutigaara Ineqarnermut, Attaveqatigiinermut, Aatsitassanut Naligiisitaanermullu Naalakkersuisup Naaja Nathanielsenip Kommunitsinnut tikilluni killiffimmik saqqummiiartornisaa, saqqumiinissaminik saaffiginnissutaa augustip naalererani pisussaq isumalluarfigaara, Stine Egede (IA) sisamanngormat tusagassiorfinnut nalunaaruteqaluni allappoq.

Mittarfiliassat pillugit paasisaqarnerugit.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER