Naaja Nathanielsen: Nikanarsaalluni tiinganiartunut naaggaarnissaq ajornakusoortarpoq

Naaja Nathanielsen ilisarisimagaanni, taava misiginartarpoq arnaasoq nukittooq, sutigut tamatigut namminersortoq, sorusunnerminillu ilisimaarinnittuusoq. Politikeritut sulingallarami isummaminik oqarsinnaaneq sapinngilaa oqallinnerillu sakkortusinnaasut merserinagit peqataaffigisarsimallugit.

Kannguttaatsuliortumiilli oqarfigineqarnerup tassanngaannartumik nukissamik nungutitsisinnaanera misigisarsimavaa.

- Mikisuaqqatut misigileriasaarpunga, suna tamarmi timinnut tunngasutut inissinneqarmat, Sermitsiaq.AG-mut oqarpoq.

Pisoq oqaluttuarisaa sakkortuutut eqqarsaatigineqarsinnaagunanngikkaluarpoq. Pisimasoq Naaja Nathanielsenip facebookimini ima oqaluttuaraa:

- Aningaasanut inatsisissap suliarinerani ingerlatarineqartut pillugit nassuiaattussaavakka. Naammassigama suliamut tunngasunik oqaasissaqanngillat, politikkikkulli qullersaat oqariasaarpoq: “Qarlinni ukunani nulugipputit”. Attorneqanngilanga, torsuusami allanik inoqarpoq, kisimiinngilanga. Mattarneqartutulli isiginnaaginnarneqartussatullu misigileriasaarpunga, paasisinnaanngisannillu kanngusuttorujussuanngorlunga. Nulukka pillugit oqaaseqartussannginnerarlugu oqarniarsarigaluariarlunga ingerlavunga.

Nikaginnittumik isiginninneq

Naaja Nathanielsen nassuiaavoq pisoq sakkortunngimmat oqaluttuarisinnaasimallugu.

- Nikanarsaalluni tingaaniarnertut misigisimasakka tassunga killiinnanngillat. Kannguttaatsuliorneq taannarpiaq oqaluttuaraara pissutigalugu oqaaseqatigiinnaalluunniit kannguttaatsuliornerusinnaanerat takutinniarlugu.

- Sulianut tunngatillugu ataatsimiigiaruma naatsorsuutiginngilara timiga nalilersorneqassasoq. Qanoq iliuusissaarunninnut pissutaavoq taassuma taamaaliornermini uannut ataqqinninnera peerluinnarsimammat.

- Taama oqarnermi pissaaneq illuatungaanut pitinneqapallattarpoq.

Naaja Nathanielsen oqaluttuarpoq kannguttaatsuliorfigitissimaneq tassumunngalu ersarissumik qisuariarsimannginnini kingorna mamiagisarsimallugu.

- Oqaatsit taakku atorlugit kanngusuttussatut inissinneqariasaarpunga, angutillu peqataasut allat isiginnaaginnarlutik.

- Qarliit taakku atoqqinngisaannarpakka.

Kisimiittutut misigisoq

Arnat Siumut qullersaannut allagaqarsimasut arlallit aamma oqaluttuarput pisumi qerisutut misigisarsimallutik. Tusarfiit allat taama misigisarneq Sermitsiaq.AG-mut namminneerlutik oqaluttuaraat.

Pisoq pereeraangat nikanarsaalluni tiinganiarfigitissimaneq pillugu oqaaseqarnissaq ajornakusoortarpoq, timikkullu kannguttaatsuliorfigitissimanerup politiinut nalunaarutiginissaa aamma ajornaatsuinnaanani.

- Kannguttaatsuliorfigitissimatilluni kisimiittutut misiginartorujussuuvoq. Sammisaq suli paquminartuummat oqaloqatigiissutiginissaa ajornakusoorpoq, Naaja Nathanielsen oqarpoq.

Arnat qulit nersualaarpai

Arnarpassuit aamma nassuiarpaat kannguttaatsuliortup, taassumallu eqqaaniittup, qanoq qisuariarnissaat annilaangagisarlugu.

- Arnat taakku ataatsimoorlutik saaffiginnissimanerat pingaaruteqarluinnarpoq. Ataatsimoorluta taama peqqinnanngitsigisumik pissusilersortarneq unitsinniarsinnaavarput.

- Pisumi tassanerpiaq killiliisinnaaneq ajornakusoortarpoq, soorlu uanga aamma misigisimaginga. Allannguissaguttali nikanarsaalluni tingaaniartarneq pillugu oqaasinnguinissarput pingaaruteqarpoq.

- Ataatsimoorneq nukittunerulersitsisarpoq. Arnallu taakku qulit nersualaarneqarluartariaqarput, Naaja Nathanielsen erseqqissaavoq.