Skip to main content

Naaja Nathanielsenip Naleqqap ininut atatillugit isumassarsiaat isumaqagiginngilaa

Naleqqap qineqqusaarnerup nalaani siunnersuutigaa, inissiat attartortittakkat attartortunit sivisuumik najorneqarsimasut akeqanngitsumik tunniunneqassasut. Ineqarnermullu Naalakkersuisunngorlaap Naaja Nathanielsenip isumassarsiaq tamanna isumaqatiginngilaa.

Inissiami attartortakkami assersuutigalugu ukiuni 30-ni najugaqarsimagaanni inissiaq akeqanngitsumik Naalakkersuisunit tunniunneqartariaqarpoq.

Naalakkersuisut taamaalillutik aserfallatsaaliinermi aningaasartuutissarpassuarnik sipaaruteqassagaluarput, attartortut aningaasat ineqarnermut akiliutissatut atugassaraluatik inip aaqqissuunneqarneranut aserfallatsaalineqarneranullu atussagaluarpaat. Naleqqamit qineqqusaarnermi taamatut siunnersuuteqartoqarpoq.

Ineqarnermut, Attaveqatigiinnermut Naligiissitaanermullu Naalakkersuisunngorlaap Naaja Nathanielsenip tamanna aaqqiissutissatut nuannarivallaanngilaa.

-Isumaqarpunga attartortut akiligassinneqarlutillu aserfallatsaaliinissamut kinguaattoorsimanermut akiliisinneqarnissaat pitsaanerpaanngitsoq, aamma taamatut ingerlatsisoqarnissaa uanga kissaatiginngilara, Naaja Nathanielsen oqarpoq.

Periarfissaqareersoq 

Taassuma ilanngullugu oqaatigaa, periusissiaq tamanna ilaqutariinnut illuni immaqa atorneqarsinnaasoq inatsisitigut aporfissaqassasoq, inissiarsuarnulli attartortorpassuanik najugaqarfigineqartumut atatillugu isumagiuminaassinnaasoq.

Naaja Nathanielsenip erseqqissaassutigaa, attartortumiit piginnittumut aaqqissuussaqareersoq, aamma nammineq sanaartorusukkaanni tapiiffigineqarnissamut aningaasaliiffigineqarnissamullu periarfissaqareersoq.

Sulili inunnut akissaqanngitsunut namminerlu pigisaqalernissamut periarfissaqanngitsunut inissianik nalinginnaasumik pisariaqartitsisoqassaaq.

Kommunit inissianik tigusingajalersut

Naalakkersuisooqatigisat isumassarsiaannut taarsiullugu, Namminersorlutik Oqartussat inissiaataasa kommuninut tunniunneqarnissaanik ukiorpassuarni pilersaarutigineqarsimasoq sulissutiginiarneqarpoq, taanna ilisimatitsivoq.

-Tunniussinissamik suliaqarnerput naammassingajalerparput, Naaja Nathanielsen borgmesterit nutaat qinersisoqareernerani inissititerereerpata ataatsimeeqatiginissaannu qaaqqusinissamik pilersaaruteqartoq oqarpoq.

- Qanoq eqqarsaateqarnersut qanorlu pilersaaruteqarnersut tusarnissaat oqaloqatiginissaallu qilanaaraara, taanna oqarpoq.

Ataatsimut isigalugit illoqarfinni anginerusuni inissaaleqineq ajornartorsiutaavoq angisooq, pisortallu kisimik tamanna suliassarinngilaat. Namminersortutut aningaasaliissuteqartartut aamma peqataatinneqassapput, Naaja Nathanielsen oqarpoq.

-Inissiarpassuit aserfallassimalluinnartut suliassaqarfigaavut. Sorliit nutarterneqassanerut sumilu nutaanik inissialiortoqassanersoq qulaajaaffigisariaqarparput.

Taassuma ilisimaarinerarpaa, Nuummi Ilulissanilu angisuunik timmisartoqarfiliortoqarnerani sanasut suliassaqarpallaartut, tamatumanilu ineqarnikkut ajornartorsiuteqarnerup aaqqiiffiginiarnera ajornaatsuinnaanngitsoq.

-Aningaasat immikkoortitat atorlugit annikinnerusumik sanaartortoqarsinnaanngilaq, taanna oqarpoq.

Atortut najukkameersut atorneqarnerorusuttut

Tamannali kisimi unammillernartuunngilaq.

-Sulisussarsiortarnerup ajornartarnera pissutigalugu, inissiat inunnut namminneq inissaminnik pissarsisinnaasunut tunniunneqartarput, tamannalu siunertaanngikkaluarpoq.

Naaja Nathanielsenip ilisimatitsissutigaa, naalakkersuisuusimasut inissianik assigiinngitsunik eqqarsaasersuuteqareersimasut. Assersuutigalugu, sanaartornermi atortunik assartuiniarluni umiarsualiveqanngitsuni suna ajornannginnerpaamik sananeqarsinnaava. Avinngarussimasuni allanilu inuusuttunut inissianik qassinik sanaartortoqarsinnaava.

-Aaqqiissutissat immikkoortiterneqassapput, qulaajaanerlu ingerlalluarpoq, taanna oqarpoq.

Naalakkersuisunnorlaap suliaqarfigissallugu pilersaarutaasa ilagaat, sanaartornermi atortunik aserfallatsaalisariaqanngitsunillu nunatsinneersunik atuisinnaanerup misissuiffiginissaa.

- Nutaanik sanaartornissaq sanaartonerunissarlu naammanngillat – sanaartukkat atasinnaasariaqarput aamma nunamut pinngortitamullu inuuffigisatsinnut naapertuuttariaqarput, Naaja Nathanielsen naggasiivoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER