Naaja Nathanielsen: Illoqarfinnut qanittuni aatsitassarsiorfeqassanersoq oqaluuserissavarput

Nunami illoqarfinnut qanittuni aatsitassarsiorfeqassanersoq oqaluuserineqartariaqarpoq. Taamatut isumaqarpoq Atsitassanut Naalakkersuisoq Kuannersuit pillugi tusarniaanermut atatillugu maannakkorpiaq Kujataaniittoq.

Kujataani ulluni makkunani innuttaasunik ataatsimiisitsinernut innuttaasut takussuuttarput. Kuannersuarni aatsitassarsiorniarneq piviusunngortinneqassappat avatangiisinut, peqqissusermut inuussutissarsiutinillu kinguneqaatigisinnaasaannik suli apeqqutissarpassuaqartoqarpoq. Aamma Kuannersuarni aatsitassarsiorniarneq piviusunngortinneqanngikkaluarpalluunniit.

Aatsitassanut Naalakkersuisup Naaja Nathanielsenip aammaarluni Sermitsiaq.AG-mut erseqqissaassutigaa, Narsap eqqaani uranitalinnik piiaasoqassanngitsoq. Aatsitassarsiortoqanngivittoqarnissaanilli neriorsuisinnaannginnerarpoq.

- Greenland Mineralsip aatsitassarsiorfiginiakkaminni uranimik saniatigut qalluisoqarani nutaamik suliniuteqassalluni aalajangissappagu, taava misissuinissamut akuersissutaateqarmata aatsitassanut inatsit malillugu tamanna suliarineqassaaq, taanna oqarpoq.

Kujataani innuttaasunik ataatsimiitsitsinernut takkuttorpassuit ilaasa paasisaqarfigerusussimavaat, nunap immikkoortuani pineqartumi siunissaq qanoq isikkoqssanersoq.

Naalakkersuisut nikerartarnerat nalornilersitsissasoq

Naalakkersuisummi nikerartuartut inatsimmik nutaamik sanajuartillugit, aatsitassarsiortoqassanersoq nunalerinermilluunniit takornariartitsisarnermillu inuussutissarsiuteqartoqassanersoq nalornissutiginearmat. 2013-imi Naalakkersuisuusut uranimut naaggaarluinnartuunik atorunnaarsippaat, maannalu naaggaarluinnartuuneq pillugu inatsisissatut siunnersuut nutaaq ukiakkut ataatsimiinnermi suliarineqartussaavoq.

Taamatut ingerlatsisoqartarnerata unitsinneqarnissaa oqartussaaqataanermi qulakkeerneqarsinnaanngilaq, Naaja Nathanielsen oqarpoq.

- Politikkikkut pissaanermik tigummiartut nikittarnerat aatsitassanut inatsimmut qanoq kinguneqarsinnaanera qulakkeerlugu oqaatigisinnaanngilarput. Oqartussaaqataanermi pissutsit taamatut ingerlasarmata. Taamaammat isumaqarpunga, illoqarfinnut qanittumi aatsitassarsiorniarnerit pillugit amerlanernit akuerineqartumik isumaqatigiissusiorniartariaqartugut, taanna oqarpoq.

Qassiarsummi Narsamilu ulluni kingullerni innuttaasunik ataatsimiisitsinerni aatsitassarsiortoqassappat pujoralaat siammarterneqarnissaannut apeqquteqartorpassuusimapput aamma Narsap eqqaani aatsitassarsiorniarneq piviusunngortinneqassappat pinngortitamut, uumasunut inunnullu kinguneqaatissai apeqqutigineqartarsimallutik.

Taarsiissuteqartoqassanersoq

Naaja Nathanielsenip oqaatigaa, aatsitassarsiorfiit illoqarfinnut qanittumiittunut kingunerluuteqartussaasut. Taamaammat politikkerit aatsitassarsiornerit sorliit nunami maani tapersersorneqassanersut pillugu oqaloqatigiissapput. Tassani pineqarlutik annertuunik annikitsunillu aatsitassarsiornissat, peqatigitillugulu illoqarfinnut najugaqarfinnullu qanoq qanitsigissanersut oqaloqatigiissutigineqassalluni.

Apeqqut alla uteqattaarneqartoq tassaavoq, aatsitassarsiorfinnut qanittuni inuussutissarsiornermik ingerlataqartut, aatsitassarsiorfiup qaninnera pissutigalugu tunisassiaminnik ikiorsiissutigisartakkaminnillu tunisaqarsinnaanngippata qanoq taarsiiffigineqarsinnaanersut.

- Nunami aatsitassarsiorfiusuni tamani nunalerinermik takornariartitsisarnermillu inuussutissarsiuteqartut taarsiiffigineqarnissaannut politikkikkut sinaakkusiinissaq kissaatigineqassappat, tamanna oqaluuserisariaqarparput, maannakkorpiarmi tamatumunnga atatillugu suli politikkeqartoqanngilaq, Naaja Nathanielsen oqarpoq.

Powered by Labrador CMS