Naaja Nathanielsen: Akitsuusersuinissaq pilersaarutaanngilaq aaqqissuusseqqinnissalli tallimat piariilerput
Akitsuutinik nutaanik, innuttaasunut toqqaannartumik eqquisussanik, atuutsitsilernissamik pilersaaruteqartoqanngilaq. Aaqqissuusseqqinnissalli arlallit inuiaqatigiinnut iluaqutaasussat aningaasartuuteqarnerulernissamillu pinngitsoortitsiniartussaasut Naalakkersuisut sulissutigaat. Aningaasanut inatsisissatut siunnersuut aappaagumoortoq saqqummiunneqarmat tamanna oqariartuutigineqarpoq.
Aningaasaqarnermut Naalakkersuisoq, Naaja Nathanielsen, aningaasanut inatsisissamut siunnersuut 2024-moortoq marlunngornermi saqqummiuppaa.
Aningaasanut inatsisissani amigartooruteqarfiusussani matussusiiniarluni akitsuutinik nutaaneq pilersitsineq pisareerpoq. Tamannali maanna pilersaarutaanngitsoq, naalakkersuisoq erseqqissaavoq:
- Aningaasanut inatsimmi amigartooruteqartoqassatillugu akissuusersuinikkut matussusiisoqassanngitsoq, Naalakkersuisut ataatsimut isigalugu isumaqatigiipput. Akitsuutit siunertaqartussaapput. Akitsuusersuinissamut siunnersuuteqartoqartassaaq aningaasat eqqortumik isertinneqarnissaat anguniarlugu. Taamaattumik nutaanik akitsuusersuinissamut naalakkersuisut maanna pilersaaruteqanngillat, Naaja Nathanielsen Sermitsiaq.AG-mut oqarpoq.
Taassuma oqaatigaa talittarfinni akitsuusersuinissaq pillugu ukiakkut ataatsimiinnissamut siunnersuutissaqarluni, tamassumunngali tunngavilersuutaavoq nunatsinni takornariat aqunneqarnerulernissaat.
Aaqqissuusseqqinnermi aningaasaqarneq patajaallisarneqassaaq
Aningaasanut inatsisissatut siunnersuut 2024-moortup saqqummiunnerani Naaja Nathanielsen ilisimatitsivoq Naalakkersuisut attassinissamut siuariartornissamullu pilersaarut 2-mik, nunatta aningaasaqarnerata patajaatsuunissanik siunertaqartumik, maanna suliaqarput. Pilersaarut ukiamut saqqummiunneqassasoq naatsorsuutigineqarpoq. Pilersaarutilli siunertaa naalakkersuisup maanna oqaluttuarisinnaalereerpaa:
- Pilersaarut aaqqissuusseqqinnermi qitiussaaq, pitsaasumillu allannguuteqartoqarnissaanut tunngaviliisuussalluni. Pingaaruteqarpoq suliniutit naalakkersuisoqarfiit akimorlugit ingerlassasut, naalakkersuisoqarfiup ataasiinnaap kisimiilluni suliaq kivissinnaanngilaa, saqqummiinermi oqarpoq.
Pilersaarutip qulakkiissavaa pisortat aningaasartuutaasa annikillisinnissaat, isertitallu annertunerulernissaat.
- Allaffissornikkut aningaasartuutit annikillisinnissaannut oqalunnerup iliuusinngortinnissaa tassani aamma pineqarpoq. Allaffissornerujussuup annikillisinnissaa kissaatigigaanni, taava aamma allaffissornermut aningaasartuutit annikillisinneqartariaqarput, ineriartorneq allami pisinnaalersillugu, Naaja Nathanielsen oqarpoq.
Aaqqissuusseqqiinerit tallimat
Taanna nassuiaavoq aaqqissuuseqqinnerit isumaqatigiissuteqarnissallu katillugit tallimat Naalakkersuisut maanna suliarigaat, taakkulu ukiakkut ataatsimiinnerup nalaani naammassisussatut naatsorsuutigineqartut.
Ukuupput:
- Ineqarnermik aaqqissuusseqqinneq
- Akileraartarnermik aaqqissuusseqqinneq
- Peqqinnissaqarfimmik isumaqatigiissuteqarneq
- Aalisarnermik inatsimmik isumaqatigiissuteqarneq
- Ilinniartitaanermik aaqqissuusseqqinneq
- Naalakkersuisuni partiinilu qulartoqassanngilaq annertuumik suliaqartoqarmat, isumaqatigiissutissallu naammassiniarlugit isumaqatiginninniarnerit arlallit maanna ingerlammata. Immitsinnut naapinniartussaavugut, inuiaqatigiinnilu aningaasaqarnerup nammaqatigiinginnarnissaa qulakkeerniassallugu, oqarpoq.
Taassuma erseqqissarpaa aningaasanut inatsisissatut siunnersuut novemberimi atsiorneqarpat arlalinnik allannguuteqarsimasinnaassasoq. Tamassumunnga pissutaapput aaqqissuusseqqinnerit arlallit ingerlammata, taamatullu partiit isumaqatiginninniarnerni kissaataat aamma peqataatinniarneqassammata.