Naaja Nathanielsen isumaqatigiissut pillugu: Suleqatigiinnerup nanginnissaanut tunngavissiilluarpoq

Inatsisartuni partiit tamarmiusut aningaasamut inatsimmut aappaagumut atuuttussamut isumaqatigiissuteqaqataallutik ataasinngornermi atsioqatigiipput. Naalakkersuisullu tamanna iluarisimaarpaa. Aningaasanummi inatsimmut isumaqatigiissusiornermi partiit tamarmik atsioqataasarnerat akuttuvoq.

- Partiit sunik pingaartitaqarnerat pillugu oqaasiinut tusarnaarluarnerma kinguneraa. Isumaqatiginninniarnerni aamma pingaartissimavara partiit tamarmik peqataatinnissaat. Oqimaannerusut iluatsittumik ingerlanniarutsigit, aamma allatigut, soorlu aningaasanut inatsimmut tunngatillugu, isumaqatigiissinnaasariaqarpugut. Suleqatigiinnissamut tunngavissaalluarpoq isumaqatigiinnerput, Naaja Nathanielsen Sermitsiaq.AG-mut oqarpoq.

Aningaasanut inatsit 2023-moortoq Inatsisartuni pingajussaaneerneqareerluni akuersissutigineqarpay, akileraartarnermut aaqqissuusseqqinnissamut partiinik aggersaassaaq.

Peqqinnissaqarfik immikkut ikiugasuarneqassaaq

Folketingimut qineqqusaarnermi ilaatigut sammineqarluarsimasoq, tassa peqqinnissaqarfik aamma isumaqatiginninniarnerni aallunneqarpoq.

- Aningaasanut inatsisip isumaqatiginninniutigineqarnerani siullermi peqqinnissaqarfimmut aningaasaliissutit inissereersimavagut. Aningaasalli illikartinneqartut amerlaneroriaannaapput, peqqinnissaq pillugu ataatsimiititaliarsuup innersuussutai upernaamut takoreersimalerutsigit.

Aningaasat qanoq atorneqarumaarnersut pillugit peqqinnissaq pillugu naalakkersuisoqarfimmit isumagineqassasut, Naaja Nathanielsen oqarpoq.

- Peqqinnissaq pillugu politikkikkut isumaqatigiissusiornissaq toqqissisimanartippallaanngilara. Isumaqarpunga partiit peqqissutsimut naalakkersuisumut, Mimi Karlsenimut (IA) isumaqatiginninniartariaqartut.

Ikiuigasuarnissaq peqqissutsimut naalakkersuisoqarfiup ataaniippoq

Peqqinnissaq pillugu ataatsimiititaliarsuup innersuussutai partiinit utaqqineqaqqaassasut isumaqatigiissutigineqarsimavoq. Innersuussutit saqqummiunneqareerpata peqqinnissaq pillugu politikkikkut isumaqatigiissut Mimi Karlsenimit suliarineqassaaq.

- Isumaqatigiissuteqarpugulli maannakkorpiaq aamma allamik iliuuseqarsinnaalluta. Tassa ikiuigasuarnissamut isumaqatigiissut suliaralugu aallartereerparput.

Suliarli pillugu Naaja Nathaniselsen oqaluttuarnerusinnaanngilaq, Mimi Karlsenili innersuussutigalugu. Taanna isumaqatigiissut siulleq naammassippat saqqummiussissaaq.

Tusagassiortunik katersortitsisoqarnerani ilaatigut taaneqarput MR scanner nutaaq kiisalu seeqqukkut siffissakkullu suliaritittussat ikilisarnissaat.

Ikiuigasuarnissamut isumaqatigiissummut aningaasaliissutit, taassumallu imarisaat Mimi Karlsenip saqqummiutissavai. Aningaasaliissutit ukioq mannamiit nassaarineqarsimasut, Naaja Nathanielsen ilisimatitsivoq.

Aalisarnermut aningaasat amerlanerusut

Isumaqatigiissutigineqartumi ilanngullugu allanik isumaqatigiissuteqartoqarpoq, tassa oqaasileriffimmut, Tiliumut sinerissallu qanittuani aalisartunut tapiissutit atuutileqqinnissaannut immikkut aningaasaliisoqarami.

- Siulliunniutsitsinertut ingerlasarpoq, ukiullu tamaasa ukioq aallartilaarsimaannartoq aningaasat nunguttarmata, maanna amerlanerutippagut, Naaja Nathanielsen oqarpoq.

Aningaasanut inatsisissatut siunnersuut saqqummiunneqaqqaarmalli KNAPK-p tamanna eqqumaffigilluarsimavaa. Kattuffik sipaarniarfigineqarpasilermat, tamanna sakkortuumik isornartorsiorsimavaat.

KNAPK-p aamma isornartorsiorpaa siunnersorteqarfik Konfifa qitiusumik allattoqarfimmut nuunneqarnissaanut naalakkersuisut suliniuteqarpasinnerat. Konfifa KNAPK-mit maanna ingerlanneqarpoq, ukiumullut 2,2 milliuunit koruuninik aningaasartaqarluni.

Qitiusumik allattoqarfimmut nuussinissaq taamaatiinnarneqarallarpoq. Siunnersorteqarfilli allarluinnarmit, aalisartunit "pallikkuminarnerusunit" ingerlanneqalissaaq.

- Imaassinnaasoq Nuup avataanut inissikkipput, Naaja Nathanielsen oqarpoq.