Skip to main content

Naaja Nathanielsen Aningaasaqarnermut Naalakkersuisunngortoq

Naaja Nathanielsenip nunap aningaasaqarneranut akisussaaffik, Asii Chemnitz Narup taarserlugu tigussavaa. Mariane Paviasen ineqarnermut attaveqaasersuutinullu akisussaaffeqalerluni naalakkersuisunngortinneqarpoq, Mimi Karlsenillu nunamut namminermut akisussaaffik tigussallugu.

Asii Chemnitz Narupip aningaasanut inatsisiliaa siulleq Naaja Nathanielsenip akisussaafigilertussanngorpaa, aningaasaqarnermut naalakkersuisuusup Kommuneqarfik Sermersuumi ineqarnermut tunngatillugu suliaq pissutigalugu atuuffimminit tunuarniarluni ullumi nalunaarutigimmagu. Naaja Nathanielsen taamaalilluni Aningaasaqarnermut, Inatsisinik Atuutsitsinermut Naligiissitaanermullu Naalakkersuisunngorpoq.

Asii Chemnitz Narupip nunamut namminermut akisussaaffigisaa, Mimi Karlsenimut Isumaginninnermut Sulisoqarnermullu Naalakkersuisuusumut nuunneqarpoq.

Naalakkersuisut aamma nutaamik ilaasortaqalerput. Urani Naamimi siulittaasuusimasoq Mariane Paviasen Naaja Nathanielsenip ineaqarnermut attaveqaasersuutinullu naalakkersuisuuffigisimasai naalakkersuisuuffigilissavai. 

Naalakkersuisut nutaat

  • Naalakkersuisut Siulittaasuat: Múte Bourup Egede.
  • Aningaasaqarnermut, Aatsitassanut, Inatsisinik Atuutsitsinermut Naligiissitaanermullu Naalakkersusoq: Naaja H. Nathanielsen
  • Inuussutissarsiornermut Niuernermullu Naalakkersuisoq: Pele Broberg
  • Aalisarnermut Piniarnermullu Naalakkersuisoq: Aqqaluaq B. Egede.
  • Isumaginninnermut, Sulisoqarnermut Nunamullu Namminermut Naalakkersuisoq: Mimi Karlsen. 
  • Ilinniartitaanermut, Kultureqarnermut, Timersornermut Ilageeqarnermullu: Peter P. Olsen.
  • Peqqissutsimut Naalakkersuisoq: Kiista L. Fencker. 
  • Nunalerinermut, Imminut Pilersornermut, Nukissiuutinut Avatangiisinullu Naalakkersuisoq: Kalistat Lund. 
  • Ineqarnermut Attaveqaasersuutinullu Naalakkersuisoq: Mariane Paviasen. 
  • Meeqqanut, Inuusuttunut Ilaqutariinnullu Naalakkersuisoq: Paneeraq Olsen.

Mariane Paviasen partiit assigiinngitsut oqaaseqartartuinit, Asii Chemnitz Narupimik suleqateqarsimanerminnut aamma qujassuteqartunit tikilluaqquneqarpoq.

Demokraatit siulittaasuatali Jens-Frederik Nielsenip oqaatiginngitsoorsinnaasimanngilaa, Naalakkersuisut katitigaanerannik aatsaats siullermeerluni allannguisoqarnera:

- Tunumut qivialaanngitsoorsinnaanngilanga. Qaammatit arfineq-marluk ingerlaneranni Naalakkersuisuni ilaasortat pingasoriarluni allanngortinneqartariaqarsimapput. Arlaleriarlutami tusartarparput, Naalakkersuisut patajaattuunissaq pingaartikkaat. Taarseraattoqarpallaaqaarli, Jens-Frederik Nielsen oqaluttarfimmiit oqarpoq.

Qinersisoqareernerata kingorna naalakkersuisooqatigiit Naalakkersuisussanik siullernik toqqaammatali, Eqaluk Høegh sivisuumik napparsimareerluni tunuarpoq, maannalu Asii Chemnitz Narup tunuarluni. Taakkua saniatigut Pele Broberg nunat allanut naalakkersuisutut tunuartinneqarnikuuvoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER