Naaja om lufthavne Naaja mittarfiit pillugit: - Innuttaasut erseqqissaavigineqassapput
Mittarfinnik suliniutit pillugit paasissutissat tamarmik saqqummiullugit, aamma mittarfinnut pingasunut aningaasartuutit amerleriartut pillugit, Naalakkersuisut suliniutip ingerlaqqinnissaanut siammasissumik isumaqatigiissusiorniarsariniarput.
Nassuiaammik Inatsisartut ataatsimiititaliaannut tallimanngornermi ulloqeqqaanerani Nuummi, Ilulissani Qaqortumilu mittarfinnut suliniutinut paasissutissat tamaasa Naalakkersuisut katersorpaat.
Aammattaaq mittarfiliornerup kingunerisaanik inuiaqatigiinnut sunniutaasussat pillugit paasissutissat katersorneqarput, suliniutillu ilaat maannakkuugallartoq kinguartinneqassappata kingunerisassai naatsumik nassuiarneqarput.
Naalakkersuisut nassuiaateqarnerminni suliap qanoq ingerlaqqinnissaanik Inatsisartuni oqaluuserinnitsitsiniarput.
Maanna aalajangiisoqassaaq
Aalajangiinerit pisariaqanngitsumik sivitsorneqassanngitsut, Attaveqarnermut Naalakkersuisoq, Naaja Nathanielsen (IA) naqissusiivoq.
- Piaarnerpaamik isumaqatigiinnissarput anguniassavara, tassami inuit utaqqiseqqissinnaanngilagut, Naaja Nathanielsen, tallimanngornermi ataatsimiinneq sioqqullugu Sermitsiaq.AG-mut oqarpoq.
Qaqortumi, Kangerlussuarmi aamma Narsarsuarmi mittarfiit pillugit aamma suliniummi aningaasartuutit katinnerat pillugit suli erseqqissaasoqanngilaq.
Millionerpassuit
Nassuiaammi 900 millionit koruunip KAIR-ip aningaasaliisussarsiussassai erseqqissarneqarput.
Nuummi Ilulissanilu saniatigut aningaasartuutit ilaatigut avatangiisinut piumasaqaatit sukanneqarnerinut, danskit angallannermut aqutsisoqarfiannit piumasaqaatinut, sulinermi missingersuutit allanngornerannut aamma mittarfiup illutassaannik kukkusumik missingersuusiornermut tunngapput, 143,5 millionit koruunit aallartisaanermi ingerlatsinermut tunngasut sivisuumik ilisimaneqareerput, kisianni siullermik naatsorsuutinut ilanngunneqarsimanngillat.
Aningaasaliissutinik amerlanerusunik pisariaqartitsisoqaleraluartoq, Nuummi Ilulissanilu suliniutit suli akilersinnaassuseqartut, KAIR ilisimatitsivoq. Taamaammat taakku 900 millionit koruunit Nationalbanken aamma danskit naalagaaffiat aqqutigalugu taarsigassarsiarineqarsinnaassanngippata, niuerfitsigut taarsigassarsiarineqarsinnaaneri naatsorsuutigineqarpoq.
Naatsorsuinerit nutaat suliarineqassapput
Naalakkersuisut naatsorsuinernik nutaanik aallartitsipput, mittarfiit pillugit isumaqatigiissutinut naatsorsuinermut tunngaviusut naapertuutinngimmata.
Sanaartornermi ingerlatsinermummullu saniatigut aningaasartuutit naatsorsuinermi ilaanngillat, Mittarfeqarfinnilu amigartoorutit matussuserneqarnissaannut KAIR Internationalimit sinneqartoorutinit akiliuteqarnissamut periarfissaq annikillivoq.
Mittarfiliortiternermut pilersaarutit tamakkiisut ilaasaluunniit taamaatinneqarnissaannut kingunerisassat ersarinngitsut, nassuiaammi atuarneqarsinnaavoq. Taamaattorli maanna aningaasartuutit atorneqareersut annaaneqassasut ilisimatitsissutigineqarpoq, aammalu isumaqatigiissutaareersut taamaatinneqarnerinut atatillugu aningaasartuuteqarnissaq naatsorsuutigineqarsinnaasoq.
Aammattaaq Kangerlussuarmi mittarfissuartut ingerlaannassappat, aamma Narsarsuarmi mittarfiu iluarsartuunneqarnissaa 800 millionit koruuninik aningaasaliinermik pisariaqartitsissapput, Qaqortumilu mittarfik taamaatinneqassappat Kujataani attaveqaatit ineriartortinneqarneri 186 millionit koruunit missaanni akeqassapput.
- Nunatsinni attaveqarnerup ineriartortinnissaannut pisariitsunik akikitsunillu aaqqiissutissanik nassaassaqanngitsoq ersarippoq, Naaja Nathanielsen oqarpoq.