Naaja Greenland Minerals pillugu: Nunatsinni eqqartuussivimmut sassartitsisariaqarput

Greenland Minerals naammagittaalliuummik tunniussinermini isumaqatigiissitsiniartoqarnissaanik piumasaqarsimanera aatsitassanut naalakkersuisumit tigulluarneqanngilaq.

Naalakkersuisoq naapertorlugu, suliami danskit naalagaaffiat Greenland Mineralsimit akuliutsinneqarusuttoq, taarsiiffigitinnissamilli piumasaqaateqartoqassappat Kalaallit Nunnaanni eqqartuussivimmi kalaallit inatsisaat malillugit suliaq ingerlanneqartariaqartoq, Naalakkersuisoq Naaja H. Nathanielsen oqarpoq:

- Ilisimatitsissutigisinnaavara, Greenland Mineralsimit arlaleriarluni oqaatigineqartarsimammat uranimik inerteqquteqarneq taakkununnga attuumassuteqanngitsoq, taamatulli isumaqarnertik eqqartuussivimmi aalajangiiffigitinnissaanut tikilluaqqusaapput, tamannali kalaallit inatsisaat malillugit Kalaallit Nunaanni ingerlanneqartariaqarpoq, Naaja H. Nathanielsen allakkatigut Sermitsiaq.AG-mut akissuteqarluni allappoq.

Inatsisilerinermi professorip Peter Paghip sisamanngornermi oqaatigaa, kalaallit uranimut inerteqquteqartoqarnissaanik oqartussaaqataanermillu kissaateqarnerat Greenland Mineralsimit ataqqineqanngitsoq pillugu Naalakkersuisut oqaaseqaramik pisunik akuleriissitsisimasut.

Professorip isornatorsiutaanut isumaqataanngitsoq

Isumaqatigiissuteqarsimasummi isumaqatigiissummut assigiinngitsunik isiginnippata, isumaqatigiissitsiniartarneq nalinginnaasuuvoq. Uranimullu inerteqquteqarneq atuutsinneqalersimagaluarpalluunniit Namminersorlutik Oqartussat taarsiissuteqarnissamut pisussaatitaasinnaapput, professori Namminersorlutik Oqartussat Greenland Mineralsillu isumaqatigiissutaannik ilisimasaqannginnerminik erseqqissaasoq oqarpoqs.

Tamannali Naaja H. Nathanielsenimit isumaqatigineqanngilluinnarpoq:

- Greenland Minerals Kalaallit Nunaannut isumaqatigiissitsiniarnermik suliaqartoqarnissaanik aalajangersimaguni, uranimut inerteqquteqarneq imminnut atuuttariaqannginneranik ilalerneqarusussimassapput, taamalu uranimut inerteqquteqartoqaraluartoq uranimik piiaasinnaanertik anguniarsimassallugu. Taamaalillutillu Kalaallit Nunaanni oqartussaaqataanerup aqqani inatsisiliortarneq imaluunniit innuttaasut uranimut inerteqquteqartoqarnissaannik kissaateqarnerannut ataqqinninnatik, naalakkersuisoq oqarpoq.

Apeqqut: Professorip Peter Paghip nassuiaatigaa, isumaqatigiissitsiniartoqassappat isumaqatigiissummi tamanna allassimassasoq imaluunniit illuatungeriiit tamatumannga isumaqatigiissuteqassasut. Greenland Mineralsimut isumaqatigiissummi allassimasoqarpa, isumaqatigikkunnaartoqassappat isumaqatigiissitsiniarnermik suliaqartoqarsinnaasoq?

- Aalajangiisimanrit isumaqatigiissitsiniartarfimmut suliassanngortinneqarsinnaanngitsut

- Ingerlatseqatigiiffiup akuersissutaanut piumasaqaatini allassimavoq, oqartussat aalajangiiffigigallarsimasaat isumaqatigiissitsiniartarfimmi aalajangiiffigineqarsinnaanngitsut. Taamatuttaaq aatsitassanut inatsimmi aalajangersagaavoq, aatsitassanut susassaqarfimmi aalajangikkat Kalaallit Nunaanni Eqqartuussivimmut suliassanngortinneqassasut. Greenland Mineralsip Danmarkimi isumaqatigiissitsiniartarfik isummertikkusuppaa, Kalaallit Nunaanni piiaanissamut akuersissummik pissarsisinnaanerlutik aamma uranimut inerteqquteqarnermut ilaatinneqarnerlutik.

- Pissutsillu taakkorpiaapput, Kalaallit Nunaanni oqartussat inatsit malillugu aamma ingerlatseqatigiiffimmut akuersissummi piumasaqaatit malillugit aalajangiiffigigallarsimasaat. Aalajangiisimaneq tamanna Kalaallit Nunaata Eqqartuussivianut suliassanngortinneqarsinnaavoq. Danmarkimi isumaqatigiissitsiniartarfimmi tamanna aalajangiiffigineqarsinnaanngilaq, Naaja H. Nathanielsen allappoq.

Siorna ukiakkut uranimut inerteqquteqaqqilernissaq aalajangiiffigineqarmat, Greenland Mineralsip Kuannersuarni suliutaa ingerlalluaruttortoq unitsinneqarpoq. Inatsisip allanngortinneqarneranut ingerlatseqatigiiffiup qanoq qisuariaateqarsinnaanera pissaanngatigineqarsimavoq, Naalakkersuisullu ilisimatitsissutigisimavaat, taarsiiffigitinneqarsinnaanermut apeqqut eqqartuussivimmut suliassanngortinneqarsinnaasoq.

Apeqqut: Naalakkersuisup ilisimatitsissutigaa, isumaqatigiissitsiniartoqarnissaanik kissaatigineqartup itigartitsissutigineqarnissaa "naatsorsuutigineqartoq". Tamatumunngalu peqatigitillugu isumaqatigiissummi isumaatigiissitsiniartoqarnissaanut tunngavissaqartoqanngitsoq naalakkersuisumit ilisimatitsissutigineqarmat, taava tamatumunnga qulartoqarpa? Danmarkimi aalajangiinerit isumaqatigiissitsiniartoqarsinnaaneranut sunniuteqarsinnaappat?

- Qularutissaanngilaq inatsisitigut eqqortumik aalajangiisoqarpat isumaqatigiissitsiniarusunneq itigartitsissutigineqassasoq, nammineerlunili aalajangiisussaanngikkaanni 100%-imik qularutissaqarani oqartoqarsinnaanngilaq, taamaammat allappara "naatsorsuutigalugu". Tamatumunnga inatsiseqarpugut, taamaammallu ilimagilluinnarpara suliakkiissutigineqartoq itigartitsissutigineqassasoq. Danmarki tamatummunga sunniuteqarsinaanngilaq, aatsitassanummi suliassaqarfik tigunikuuarput.