Múte: Siumumi pissaaneqarniunneq nunatsinnut ajoqusiivoq

- Siumumi pissaaneqarniunneq erseqqilluinnartoq politikkikkut sulianiarnermut ajoqutaalerpoq, naggataatigullu tamanna nunamut ajoqutaalertussaalluni, IA-mi siulittaasoq Múte B. Egede erseqqissaavoq.

- Ullormi ataatsimi politikkikkut aaqqiissutissat pillugit isumaqatiginninnaraanni, aqanguani naalakkersuisooqatigiinni partiit annersaat allatorluinnaq nalunaaruteqariasaartarpoq. Tamanna attanneqarsinnaanngilaq, IA-mi siulittaasoq oqarpoq.

Nunami partiit illuatungiliuttut annersaat Siumukkormiut tamanit takuneqarsinnaasumik pissaaneqarniunneranni eqqissilluni ilorrisimaartariaqaraluarpoq.

Kim siulittaasuuginnarnissamut tunngavissaarutsinniarneqartoq

Kingullermik partiimi allatsi Mikael Petersen suliunnaarsinneqarpoq, tassani arlallit isumaqarput, partiimi ilaasortat ilaasa Kim Kielsenip pissaanermik tigummiaqarnera partii nuna tamakkerlugu ataatsimiilerpat tunngavissaarutsikkusukkaat.

Mikael Petersen partiini assigiinngitsuni, politikkerinit arlalinnit partiimi allattaalluartutut isigineqarpoq, sineriammi Siumumi ilaasortarpassuarnik ataatsimoortitsisinissamik attaveqartarnissamillu paasinnissimasutut isigineqarluni, partiimi allatsip 2014-imili aalajaattumik sulisimanera Kim Kielsenimut nukittorsaataasimavoq.

- Siumup politikkianik kina ingerlatsisuunersoq nalornissutigineqarmat politikkikkut suliniarnerput unittoorsimavoq, tamannalu attanneqarsinnaanngilaq, IA-mi siulittaasoq oqarpoq.

- Kikkut tamangajalluinnarmik Siumup iluani eqqissiviilliortoqarnera qattuppaat. Nunarput tutsuviginartumik, aalajaattumik naapeqatissarsiorsinnaasumillu aqunneqartariaqarpoq, Mute B. Egede oqarpoq.

Inatsisartuni eqqarsaasersortoqaqaaq, malunnarporlu qinersisoqangajalernersoq partiini assigiinngitsuni oqaluuserineqarnera.

Qinersisisoqassanersoq qinesisoqassannginnersorluunniit

Ilaat isumaqarput, partiimi pissaanillit Mikael Petersenimik tunuartitsisimanerat pissutigalugu Kim Kielsenip qinersisoqarnissaanik nalunaaruteqarnissaq qunugingaa, tamatumami malitsigisaanik Kim Kielsenip sineriammi tapersersortini pingaarnerit annaassagamigit.

Allalli akerliarnik oqarput, Kim Kielsen partiip iluani saliiniarluni qinersisoqarnissaanik nalunaaruteqassangaluarput tupaallaatiginaviarnagu.

Qinersisoqareerneratigut pissaanermik tiguseqqissaguni, partiip nuna tamakkerlugu ataatsimiinnerani, Erik Jensenimit Vivian Motzfeldtimillu unammillerneqarnermini nukittunerusutut inissisimalissaaq.

Akerlianik pissaanermik annaasaqassaguni Naalakkersuisunullu siulittaasuuneq allamut tunniuttariaqarlugu, unammillertigisimasani pisuutissinnaavai. Aamma Inatsisartunut qinersisoqassappat Kim Kielsen siulittaasutut tusagassiorfinnit sammineqangaatsiassaaq, taamalu partiit annersaanni taaguunneqarnerpaanissaa ilimanarluinnarluni.

Arlaanaalluunniit eqqarsaasersuuteqarnerminnik saqqummiusserusunngilaq, sammineqartorli issuaaffigineqarani oqaluusererusunneqarluni.

Sermitsiaq.AG-mit Kim Kielsen attaveqarfiginiarneqaraluarami ilutsinneqanngilaq.

Siulersuisut ataatsimiinnerat

Siumumi siulersuisut ataasinngorpat ataatsimiissapput. Partiimilu ulluni makkunani susoqarnersoq pillugu partiimi aqutsisut innuttaasunut tupigusuttunut ilisimatitsilersaarnersut ilisimaneqarani.

Tusagassiorfiit maannamut tusagassiortunik katersortitsinissamut aggersarneqarsimanngillat.