Múte: Pingaaruteqarpoq aalisarnerup siunissaa eqqanaassallugu
Issittup avannaarsuata kippasissortaaani immap sikuujuaannarsimasup Sullualuup (nordvestpassagen) sikup aanneratigut imaatigut aqqutip nutaap angallavigineqalernissaa sioqqullugu nunatta nunarsuarmi aalisarnernikkut siuarsimanerpaat ilaattut inissisimanera sutigut tamatigut qulakkeerniarneqassaaq.
Nunatta unammilligassaa nutaaq, taamaattorli aamma periarfissanik nutaanik ammaassisussaq inuiaqatigiinnut kalaallinut ulluinnanngornissaanut piffissaq apeqqutaaginnartoq, aviisi Sermitsiaq taama allappoq.
Taanna tassaavoq issittup avannaarsuata kippasissortaani immap sikuujuaannarsimasup aanneratigut imaatigut aqqutip periarfissaalerneratigut umiarsuarsuit pajuttaatut nunanit tamalaaneersut kitaata imartaa aqqusaarlugu ingerlaartalernissaat. Imaatigut aqqummi pineqartumi Sullualukkooriartorfiusumi nunatsinnit aalisarneq aamma ingerlanneqarpoq tamatumalu saniatigut Pikialasorsuaq Qaanaap aammali Ellesmere Islandip akornanni Baffinnip kangerliumanersuata avannamut killeqarfia aqqusaarneqartalertussaalluni.
Naalakkersuisut siulittaasuat, Múte Bourup Egede (IA) tassunga tunngatillugu oqarpoq avatangiisit illersorneqarnissaat sutigut tamatigut qaffasissorujussuutissallugu pingaaruteqartoq, taamaaliornikkut nunatsinni aalisarnermik inuussutissarsiuteqarneq imaatigut aqqutip nutaap atorneqarneruleriartuinnarneratigut innarliinnginnissaa qulakkeerniagassaammat:
- Aalisarneq inuussutissarsiutitta pingaarnersaraat. Aalisarneq pikkoriffigaarput nalunngilarpullu qanoq ingerlatissanerlugu ineriartortissanerlugulu. Qanorluunniimmi inuussutissarsiutit allat, assersuutigiinnarlugu aatsitassarsiorneq takornariaqarnerlu inerisartigigaluarutsigit, uanga isinni aalisarneq nunatta inuussutissarsiutigiuartussaavaa pingaarneq. Taamaammat pissutsit nutaat atuutilernissaanni sutigut tamatigut avatangiisit illersorneqarnissaat assut pingaaruteqarpoq, Múte Bourup Egede (IA) erseqqissaavoq.
Aviisimi Sermitsiami allaaserisaq tamakkerlugu atuarsinnaavat: