Mútep ukiortaami oqalugiaataa siulleq: Nunarsuarmioqataaneq, toqqissisimasumik peroriartorneq naligiinnerunerlu

Ukiortaaq 2022-mi Múte B. Egedep oqalugiarnera Naalakkersuisut Siulittaasuattut ukiortaami oqalugiarneraa siulleq. Oqalugiarnermini aallarniilluni nunatsinnit arnat assammik arsartartut nunarsuarmi pissartanngorniunnissamut anngunniunnerni peqataasimanerannut nersualaarpai.

- Kulturilerisortatta, timersortartut peqatigiiffilerisullu - Inuiaqatigiinni ataatsimoornermik
annertuumik misigitittarpaatigut. Timersortartuvut takutitsilluartut tulluusimaarutigisavullu ukiumi qaangiuttumi arlaqaqaat, Naalakkersuisut siulittaasuat, Múte B. Egede oqarpoq.

Aammali nunarput atuakkialerinermi nunani avannarlerni maluginiarneqarluarsimanera oqaatigaa. Niviaq Korneliussenilu nunat avannarliit atuakkiortunut nersornaasiuttagaannik 2021-mi nersorneqarsimanera tulluusimaruutigalugu.

- Atuakkiortup inuusuttup, Niviaq Korneliussenip Nunat Avannarliit Atuakkiortunut nersornaasiuttagaannut, nunatsinniit siullerpaalluni nersorneqarnera tulluusimaarutissaraarput. Tulluusimaarnittali aamma malittaanik atuakkiaata, ‘Naasuliartarpi’-p, inuiaqatigiinni unammilligassatta iliuuseqarfigisariaqakkattalu ilaannik, imminut toquttarnerup qaangerniarnissaanut oqariartuuteqarnera maluginngitsuugassaanngilaq, Múte B. Egede oqarpoq.

Peroriartorneq toqqissisimasoq

Múte B. Egedep oqariartuutigaa pingaaruteqartoq innuttaasut imminnut tapersersoqatigiittarnissaat.

Aammali meeqqat toqqissisimasumik peroriartornissaat Naalakkersuisuni suliani qitiulluinnartut, Múte B. Egedep oqaatigaa.

- Ilaqutariittullu toqqissimaneq qitiulluinnarpoq. Inuiaqatigiittut tamanna angussagutsigu pingaaruteqarluinnarpoq ineqarnikkut, inooqatigiinnikkut ataqqeqatigiinnikkullu siuarsaanissarput. Ilinniartitaanerup siammasissup qaffassarnissaa pingaaruteqarluinnarpoq. Inuiaqatigiinni pisariaqartitagut piginnaasatta ilinniartitaanikkut tunngavilerneqarnissaat pisariaqarpoq. Taamaaliornitsiugut suliffeqarnikkut toqqissisimaneq annerusoq pilersissinnaavarput inuttullu ataasiakkaatut imminut ilaqutariittullu pilersorsinnaanerput qaffassarsinnaallugu – inuuniarnikkut ineqarnikkullu.

Ineqarnermullu aaqqissuusseqqinneq alloriarneq tulliassasoq oqariartuutigalugu.

- Ukiumi nutaami inuiaqatigiit siuariartornissaannut alloriarnerit tullii tigusariaqarpagut. Ineqarnermut aaqqissuusseqqinneq arloriarnerit pingaarnerpaat ilagivaat.

- Angerlarsimaffimmi tassaavoq inuunitsinni toqqissimaffissat pingaarnerpaat ilaat, Múte B. Egede oqarpoq.

Imminut pilersorneq napatissinnaasoq

Naalakkersuisut siulittaasuata nunatsinni piniarnermik aalisarnermillu ingerlataqartut pikkoriffeqartut oqaatigaa. Ukiumi nutaami aalisarneq pillugu isumasioqatigiissitsisoqartassaaq, innuttaasut inuussutissarsiutip ineriartortinnissaanut peqataatinneqarnissaat pillugu. Aammali piniakkat mianerineqarnissaat oqariartuutigiumavaa.

- Aalisarneq, takornariaqarneq avatangiisittalu atorluarneqarnissaat qulakkiissagutsigit Apollop Saattormiup oqaasii atorlugit aqqutip atugassatta qiterpiaa naatsumik imatut eqikkarneqarsinnaavoq: “Kingullertut inuusutut piunnaartariaqarpugut.”, issuaavoq.

Nunat pissaanillit nunarput isigaat

Kalaallit Nunaanni inuiaqatigiit ikittunnguugaluartut, taamaattoq nuna angisoorsuuvoq. Nunarsuullu sinneranut inissisimaneq pitsaalluinnarmat, tamanna nunarsuup sinneranut sunniuteqaqataanermik tunniussisinnaanermillu periarfissiisoq Naalakkersuisut siulittaasuata ukiortaami oqalugiarnermini naqissuserpaa. Tunniussaqarsinnaanermi erngup nukiganik nukissiuutit avammut tunisassiarineqarsinnaanerat oqaatigaa.

- Nukissiuuteqarnermik imminut akilersinnaasumik napatissinnaalluarpugut. Nukinnik sinnilinnik peqarpugut nunatta inuussutissarsiornikkut iluaqutissaanik. Ataavaartumik nukissiuteqarneq erngup nukia atorlugu nunarsiarmioqatigiit nukissiutiminnik allannguiniarnerannut tunniussassaqarpugut niiverutaallualersinnaasumik.

Naggasiullugu innuttaasut imminnut ataqatigiinnissaanik ikioqatigiinnissaannillu kaammattorpai.