Mútep niueqatigiinnissamik isumaqatigiissuteqarnissaq sukkanerusumik angorusukkaa

Múte B. Egedep Tuluit Nunaata Danmarkimi ambassadøria, EU avaqqullugu niueqatigiinnermi isumaqatigiissuteqarsinnaaneq, silap pissusaa ilisimatusarnerlu pillugit tallimanngornermi ataatsimeeqatigivaa.

Naalakkersuisut Siulittaasuata Múte B. Egedep (IA), Danmarkimi Savalimmiunilu naalakkersuinikkut siuttut Naalagaaffeqatigiinni pingaarutilimmik ataatsimeqateqatigeerlugit, Tuluit Nunaata Danmarkimi ambassadøria Emma Hopkins tallimanngornermi ataatsimeeqatigaa.

- Tulit ambassadøriata ataatsimeeqatiginissaa pingaartissimavara, Tuluimmi Nunaat EU-mit animmat niuernikkut isumaqatigiissuteqarfiginissaat anguniarlugu politikkikkut suliaq sukkanerusumik ingerlakkusukkatsigu, Múte B. Egede Sermitsiaq.AG-mut oqarpoq.

Taassuma erseqqissaatigaa, Tuluit Nunaanni niueqateqarnissaq nunami aalisarnermik inussutissarsiuteqarnermut pingaaruteqartoq, ukiumut 700 millioner koruunit sinnerlugit nalilinnik Tuluit Nunaannut tunisisoqartarmat.

- Isumaqarpunga ullumi ataatsimeeqatigiinneq niueqatigiinnissamik isumaqatigiissutissaq inissinniarlugu sulineq sukkanerusumik ingerlanneqalersoq. Isumaqatiginninniarnerit piffissami aggersumi tigussaanerulissapput, naatsorsuutigaaralu piffissami qaninnerpaami Tuluit Nunaannik isumaqatigiissuteqarumaarluta.

Mute B. Egedep Emme Hopkinsillu niueqatigiinnissamik isumaqatigiissuteqarnissap saniatigut silap pissusaa ilisimatusarnerlu pillugit siunissami suleqatigiissutigineqarsinnaasut oqaluuserisimavaat.

- Nunat marluulluta EU-mi ilaasortaannginnata taakku pineqartut suleqatigiissutiginerunissaat soqutigisaraarput, taamalu EU avaqqullugu suleqatigiissinnaalluta.

Powered by Labrador CMS