Mútep Mette naapissagaa
Múte B. Egede (IA) Pele Brobergilu (N) Naalagaaffeqatigiit ukiumoortumik ataatsimiinnissaannut atatillugu Danmarkiliarput. Naalagaaffeqatigiit ataatsimeeqatigiinneranni nalinginnaasumik Ministeriuneq, Savalimmiuni Kalaallillu Nunaanni Naalakkersuisut Siulittaasui kisimik ataatsimeeqatigiittaraluarput, ukiorli manna allat marluk peqataasussatut qaaqquneqarsimapput.
Naalakkersuisut Siulittaasuat Múte B. Egede aamma Nunanut allanut Naalakkersuisoq Pele Broberg (N) Naalagaaffeqatigiit sisamanngorpat Københavnimiittumi Marienborgimi ukioq manna ataatsimeeqatigiinnissaannut ornigullutik ullumi marlunngornermi Danmarkiliassapput.
Múte B. Egedep Sermitsiaq.AG-mut ilisimatitsissutigaa, nunanut allanut politikki oqaluuserineqassamaartoq, taamaammallu nunani pineqartuni nunanut allanut politikkikkut akisussaasuusut peqataatinneqarniartut.
Mette Frederiksenimik ataatsimeeqateqaqqaarniartoq
Naalagaaffeqatigiit sisamanngornermi ataatsimeeqatigiinnissaannut atatillugu, Múte B. Egede ministeriunermik Mette Frederiksenimik ataatsimeeqateqarnissamut aamma isumaqatigiissuteqarpoq. Múte B. Egedep Naalakkersuisunut Siulittaasunngoramili aatsaat siullermeersumik Mette Frederiksenilu naapillutik ataatsimeeqatigiittussanngorput.
Ataatsimeeqatigiinnissani marluusuni suut oqaluuserineqarniarnersut suli saqqummiunneqarsimanngillat, oqaluuserineqartussatulli qularutigineqanngitsut ilagaat, nunat akunnerminni siunissami suleqatigiinnissaat aamma Kalaallit Nunaata qanoq annertutigisumik oqaaseqartinneqarnissaa.
Naalakkersuisut nutaat nunanut allanut tunngatillugit Pele Brobergimik akisussaasoqartut erseqqissaassutigereernikuuaat, oqartussaaffiit angerlaanneqareersimasut Kalaallit Nunaannit akisussaaffigineqartut.
Aappaatigulli naalagaaffiit pissaanilissuit sillimaniarnermut politikkiminnut atatillugu Issittumut soqutiginnikkaluttuinnarneranni, Danmark sillimaniarnermut politikkikkut akisussaasuugami oqartussaaffinnut allarpassuarnut suli oqaasissaqartuuvoq.
Illersornissamut isumaqatigiissut oqaluuserineqassava?
Aamma illersornissamut isumaqatigiissutip ulluni kingullerni saqqummiunneqartup oqaluuserineqarnissaa avaqqunneqarsinnaagunanngilaq, tassami Danmarkimit issittumi piginnaasanik annertusaanissamut 1,5 milliarder koruunit immikkoortinneqarsimapput.
Pele Brobergip oqaatiginikuuaa, isumaqatigiissut Folketingimi suliarineqarsimasoq, tassa danskit partiivisa kalaallit naammattumik peqataatinnagit suliarisimagaat.
Pele Brobergip Sermitsiaq.AG-mut erseqqissaatigaa, isumaqatigiissutigineqarsimasup isumaqatiginninniutigineqarnissaa suli suliarineqartoq.
- Danmarkimi illersornissamut ministeri Trine Bramasen tigussaasumik oqaloqatigilluarpara, Pele Broberg oqarpoq.
Naalagaaffeqatigiittut ataatsimeeqatigiittarneq
Naalagaaffeqattigiit ataatsimeeqatigiinneranni naalakkersuisunikkut siuttut pisortatigoortuunngitsumik politikkikkut oqaloqatigiittarput. Naalagaaffeqatigiit kingullertigut ataatsimeeqatigiinneranni politikkikkut suliniutissat saqqummiunneqartarsimapput. Siusinnerusukkut ataatsimeeqatigiinnermi ilaatigut timmisartoqarfiliornissat aamma Amerikamiut sakkutooqarfigisimasaanni atortulersuutinik saliinissaq oqaluuserineqarsimapput.