Mútep Løkke ataqqinninnginnerarlugu isornartorsiorpaa

Danmarkip Kalaallit Nunaatalu akornanni attaveqatigiinneq equngasumik ingerlalersimasoq, ajornartorsiutit arlallit takutikkaat, Naalakkersuisut siulittaasuat isumaqarpoq.

Danmarkip Kalaallit Nunaatalu akornanni ataqatigiinneq equngasumik ingerlalerpoq. Nunanut allanut tunngasunut ministerilu Lars Løkke Rasmussen ajornartorsiutit ilagaat, Naalakkersuisut siulittaasuat Múte B. Egede taama isumaqarpoq.

Danmarkimi naalakkersuisut nutaat atulermata, Kalaallit Nunaata Danmarkillu akornanni attaveqatigiinneq pitsaanerusumit ajornerusumut inissippoq.

Naalakkersuisut siulittaasuat, Múte B. Egede (IA), Politikenimut taama oqarpoq.

Pingaartumik nunanut allanut tunngasunut ministeri Lars Løkke Rasmussen (M) isornartorsiorpaa, pitsaasumik suleqatigiinnissamut taanna aporfilersuinerarpaa.

Múte B. Egedep ilaatigut Afrika Kujallermut maanna aallartitap, Tobias Elling Rehfeldip, Issittumi aallartitatut nutaatut toqqarneqarnera ilaatigut oqaatigaa.

Toqqaaneq tinnersaanertut isigineqartoq

Nunanut allanut tunngasunut ministereqarfik immikkut inuiaassuseq malillugu aallartitanik toqqaaneq ajortoq, Lars Løkke Rasmussen siornatigut oqarnikuuvoq. Toqqaanerli Kalaallit Nunaannut tinnersaanerunera, Múte B. Egedep attappaa.

- Nunanut allanut tunngasunut ministereqarfiup qanoq uagutsinnut isiginninneranik periuseq takutitsivoq, uagullu kunngeqarfimmi Issittumi nunataagaluarluta peqataatinneqanngilagut. Ersarippoq, Savalimmiut Kalaallit Nunaallu pillugit aalajangiinerit Savalimmiut Kalaallit Nunaallu avaqqullugit pisannginnissaannik Danmarkip paaseqatigineqarneranut innersuussilluni taanna oqarpoq.

Folketingimut ilaasortap Aki-Matilda Høegh-Damip (S) Folketingimi maajip aallartinnerani kalaallisut oqalugiarnerata oqallinnermik kinguneqartitsinerani, Danmarkip Kalaallit Nunaatalu akornanni ataqatigiinnerup ”maanna pitsaanerpaannginneranik” uppernarsaasoq, tamatuma saniatigut Múte B. Egede isumaqarpoq.

Spiralilersuineq pillugu suliaq kinguaattoortoq

Kalaallit arnat tuusintilikkaat danskit suliaqarneranni akuersiteqqaarnagit spiralilersorneqarsimanerat pillugu danskit naalakkersuisuisa qulaajaanerup suli aallartissimannginnera, Naalakkersuisut siulittaasuata aamma isornartorsiorpaa.

Danskinut pissutsinut tunngasuusimagaluarpat, suliap ingerlanera sukkanerusimassagaluartoq, Múte B. Egede qularutiginninngilaq.

Tamanna Danmarkip sillimaniarneq pillugu politikkimini Issittup aallunnerunissaanik kissaateqarneranut kinguneqarsinnaasoq, taanna aarlerisaarivoq, pingaartumik Lars Løkke Rasmussen ataqqinninnermik takutitsinngippat.

Lars Løkke Rasmussenip isornartorsiuineq ajuusaarutigilluinnarlugu Politikenimut oqaatigaa, taassumalu Mùtep ataatsimeeqatigeqqinnissaa paatsooqatigiinnerillu qulaajarnissaat qilanaaraa.

Powered by Labrador CMS