Skip to main content

Mútep Kielsenip Namminersorlutik Oqartussat ingerlatseqatigiiffiutaannut piumasaqaataa uteqqikkaa

Namminersorlutik Oqartussat ingerlatseqatigiiffiutaat Kalaallit Nunaanni inissaaleqinerup aaqqiiffigineqarnissaanut ikiuutissapput, Naalakkersuisut Siulittaasuat Múte B. Egede, Kim Kielsenip pineqartoq pillugu 2020-mi saqqummiussaanik nangitsisoq erseqqissaavoq.

Naalakkersuisut Siulittaasuata Múte B. Egedep, Royal Arctic Linep ataasinngormat ataatsimeersuarnera aallarnerlugu oqaaseqarami, Naalakkersuisunngortut nutaat Namminersorlutik Oqartussat ingerlatseqatigiiffiutaannut sunik piumasaqaateqarlutillu kissaateqarnersut saqqummiuppai.

- Kalaallit Nunatsinni sumiiffinni assigiinngitsuni suli inissaaleqisoqarpoq, isumaqarpungalu aktieselskabit Namminersorlutik Oqartussanit pigineqartut tassunga tapersiissuteqarsinnaasut, nalunngilaralu maani najuuttusi arlaqartut akornassinni tamanna pillugu isumaliuteqalereerlusilu pilersaarusiaqalereertusi, Múte B. Egede oqarpoq nangillunilu oqaatigalugu:

Oqaloqateqarniartoq 

- Tamanna pillugu selskabit aqutsisui oqaloqatigissavakka selskabit alisinnerusoq isigalugu peqatigiillutik inissianik nutaanik qanoq pilersitsisinnaanersut inisaaleqineq annertooq tamanna millisarniarlugu.

Naalakkersuisunut Siulittaasuusimasoq Kim Kielsen 2020-mi februaarip qaammataani ingerlatseqatigiiffiit siulersuisui Ilulissani isumasioqatigiimmata inissaaleqisoqarnera pillugu saqqummiussivoq. Tamatumali kingunitsiannguatigut corona nunarsuarmi tuniluutilerpoq politikkikkullu sammisat allanngorlutik.

Ilanngutassiaq atuaruk:

Kim Kielsen: Ingerlatseqatigiiffiit qaammatit pingasut ineqarneq pillugu aaqqiissutissarsiussapput

Múte B. Egedep oqaaseqarnera Royal Arctic Linep ataatsimeersuarneranut kisimi tunngatinneqanngilaq, Namminersorlutilli Oqartussat ingerlatseqatigiiffiini aqutsisunut tamanut saaffiginnissutaalluni. Tassani Naalakkersuisut nutaat ingerlatseqatigiiffinnut naatsorsuutaat pillugu politikkikkut oqariartuutigineqarpoq.

Isumaginninnikkut akisussaaffeqarneq

Oqaaseqarnermi pingaarnertut oqariartuutigineqartoq tassaavoq, ingerlatseqatigiiffiit inuiaqatigiinnut qanoq tapiissuteqarsinnaanera. Aningaasanik Nunatta Karsianut tunniussinerinnaanngitsoq, aammali aningaasaliiissuteqartarnikkut sulisussaqarnikkullu:

Meeqqat, inuusuttut ilaqutariillu akornanni suliniutit. Suliniutit aningaasaliinertaqarsinnaapput imalt. CSR qitiutillugu suliniutit.

Kultureqarnikkut, eqqumiitsuliornikkut timersornikkullu annertunerusumik suliniuteqarneq. Ilaatigut Eqqumiitsuliornermut Aningaasaateqarfimmit, timersoqatigiiffinnit, soorlu GIF imalt. Elitesport Greenlandimit, imalt. CSR-ip
suliniutai aqqutigalugit.

Múte B. Egedep erseqqissaatigaa, ”tamatta ataatsimoortumik naliliisinnaassuseqarluta eqqarsartaaseqartariaqartugut immikkoortortaqarfinnut imminnut mattussuunnata”.

Najugaqavissunik sulisoqartarnissaq

Naalakkersuisut Siulittaasuata aamma najugarisap iluani aallaavilimmik isumaliortaaseqarluni suleriuseqartoqartarnissaa pingaartippaa, erseqqissaatigalugulu ingerlatseqatigiiffiit najugarisami pitsaanerpaamik piginnaanilinnik sulisussarsiortarnissaat. Apeqqutigaa suli pitsaanerusumik iliuuseqartarsinnaanersugut.

- Naalakkersuisut taamatut isumaqarput, tamannalu tunuliaqutaralugu piumasaraarput suli annertunerusumik suliniutigissagipput sulisinnaasut najugaqavissut aamma atorfinni qaffasinnerusuni atorfinitsinneqartassasut. Ilissilu pissutsit assigiinngitsut pissutigalugit allatut ajornartumik sipaarniuteqaleraangassi soraarsitsinialeraangassilu
nunaqavissut siulliullugit eqqortassanngikkisi, Múte B. Egede, ”piginnittussaanermut politikki pimoorussisoq, politikerilli akuliutinnginnissaannik pingaartitsisoq anguniarneqartoq” erseqqissaasoq oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER