Múte: Nunaqarfinni najugallit siunissartik namminneq aalajangiiffigissavaat

Nunaqarfinni, pingaartumik Qaarsuni Niaqornanilu najugallit, Karrat Kangerluanni qaqqamik sisoortoqariasaartoqassappat nunaqarfimminnik nungutitsisinnaasumik tassaarsuaqarsinnaanera atorsinnaassanerpaat?

Apeqqut tamanna nunaqarfinni najugallit namminneq aalajangiiffigisariaqarpaat, taamatu nalunaaruteqarpoq Naalakkersuisut Siulittaasuat Múte B. Egede, ullumi marlunngornermi nunaqarfinnut taakkununnga marlunnut tikeraarami, aamma ulluni aggersuni nunaqarfinnut ulorianartorsiunnginnerusunut ilisimatitsissuteqariartortussaavoq.

Erseqqissumik nalunaaruteqartarnissaq

- Naalakkersuisuni pingaartitaraarput ammasumik erseqqissumillu nalunaaruteqartarnissaq – aamma ernunatitsilissagaluarpalluunniit. Taamaammat maannakkut paasissutissiivugut, innnuttaasullu pineqartumit attorneqartut tamaasa isaatigut isigalugit qanoq periarfissaqarnerannik oqaluttuunnissaat qulakkeerlugu, naak nuanninngitsumik nutaarsiassikkaluarlugit, Múte B. Egede tusagassiorfinnut naatsumik nalunaaruteqarluni oqarpoq.

Nunaqarfinni najugallit allamut nuukkusussagaluarunik inissaminnik tunineqarnissamut neriorsorneqanngillat. Allalli assigalugit inissiamik inuttaqanngitsumik nassaarsinnaagunik attartorsinnaasaminnik qinnuteqarsinnaapput.

Oqartussat Múte B. Egedemik siuttoqarlutik aqangu ullunilu aggersuni, Ikerasammi, Saattuni, Uummannami Ukkusissanilu nutaarsiassaq nuanniitsoq pillugu ilisimatitsissuteqassapput.

Ilisimatitsissuteqarnissamut piffissaliussat

Ikerasak:

• Pingasunngorneq 12. maj 2021 nal. 11:00.

Saattut:

• Pingasunngorneq 12. maj 2021 nal. 15:30.

Uummannaq:

• Sisamanngorneq 13. maj 2021 nal. 13:00 (Illorsuarni innuttaasunut).
• Sisamanngorneq 13. maj 2021 nal. 16:00 (Nuugaatsiami innuttaasunut).

Sisamanngorneq 13. maj 2021 nal. 19:30 (Uummannami innuttaasunut allanut).

• Ukkusissat:

Tallimanngorneq 14. maj 2021 nal. 09:00.