Múte: Kangiani ilinniarfimik pilersitsisoqarli
Tasiilami ilinniarfimmik pilersitsisoqarnissaa "avaqqunneqarsinnaanngitsoq", IA-mi siulittaasoq Múte B. Egede isumaqarpoq.
Paragraf 37 naapertorlugu apeqquteqarnikkut IA-mi siulittaasoq, Tunup ineriartortinneqarnissaa periarfissaanerarpaa, piviusunngortinneqassappallu Tasiilami piginnaalersitsiffiusumik ilinniarfeqartariaqarpoq.
Taamaattumik ilinniarfimmik qanoq ittumik pilersitsinissamut pilersaaruteqartoqarnersoq Naalakkersuisut apeqquteqarfigai. Tamatuminnga pilersaaruteqartoqanngippat, Múte B. Egede tunngavilersuisoqarnissaanik kissaateqarpoq.
Kalaallisuuliorfik
2017 upernaakkut ataatsimiittoqarnerani Inatsisartuni isumaqatigiissutigineqarpoq, tunumi kalaallisuuliorfimmik kulturikkut tammatsaaliinissamik siunertalimmik pilersitsisoqarnissaa.
Naalakkersuisut sulinermi tassani sumut killinnerannik paasisaqarusuppoq, tamanna ukiut marluk matuma siorna suliakkiissutigineqarpoq.